எம்சிசி - முருகப்பா ஹாக்கி போட்டி: சென்னையில் நாளை தொடக்கம்

சென்னை: எம்​சிசி – முரு​கப்பா தங்​கக் கோப்பை அகில இந்​திய ஹாக்கி போட்​டி​யின் 96-வது பதிப்பு வரும் நாளை (10-ம் தேதி) தொடங்கி வரும் 20-ம் தேதி வரை சென்னை எழும்​பூரில் உள்ள மேயர் ராதாகிருஷ்ணன் விளை​யாட்​டரங்​கில் நடை​பெற உள்​ளது. முதன்​முறை​யாக இம்​முறை மலேசிய நாட்​டைச் சேர்ந்த மலேசியா ஜூனியர் நேஷனல் அணி கலந்​து​கொள்​கிறது.

தொடரில் கலந்து கொள்​ளும் 10 அணி​கள் இரு பிரிவு​களாக பிரிக்​கப்​பட்​டுள்​ளன. ‘ஏ’ பிரி​வில் நடப்பு சாம்​பிய​னான இந்​தி​யன் ரயில்​வேல்​ஸ், இந்​தி​யன் ஆர்​மி, என்​சிஓஇ (போ​பால்), மகா​ராஷ்டி​ரா, தமிழ்​நாடு ஆகிய அணி​கள் இடம் பெற்​றுள்​ளன. ‘பி’ பிரி​வில் ஐஓசி, மலேசியா ஜூனியர் நேஷனல், கர்​நாட​கா, மத்திய நேரடி வரிகள் வாரியம் (டெல்லி),இந்​திய விமான படை ஆகிய அணி​கள் இடம் பெற்​றுள்​ளன.

ஒவ்​வொரு பிரி​விலும் இடம் பெற்​றுள்ள அணி​கள் தங்​கள் பிரி​வில் உள்ள மற்ற அணி​களு​டன் தலா ஒரு முறை லீக் சுற்​றில் மோதும். லீக் சுற்​றின் முடி​வில் இரு பிரி​விலும் முதல் இரு இடங்​களை பிடிக்​கும் அணி​கள் அரை இறு​திக்கு முன்​னேறும். அரை இறுதி ஆட்​டங்​கள் 19-ம் தேதி நடை​பெறுகின்​றன. இதில் வெற்றி பெறும் அணி​கள் 20-ம் தேதி நடை​பெறும் இறுதிப் போட்​டி​யில் பலப்​பரீட்சை நடத்​தும்.

சாம்​பியன் பட்​டம் வெல்​லும் அணிக்கு ரூ.7 லட்​சம் பரிசுத் தொகை வழங்​கப்பட உள்​ளது. 2-வது இடம் பிடிக்​கும் அணி ரூ.5 லட்​சம் பரிசுத்​தொகையை பெறும். அரை​யிறு​தியில் தோல்வி அடை​யும் அணி​களுக்கு தலா ரூ.50 ஆயிரம் பரிசுத் தொகை அளிக்​கப்பட உள்​ளது. இயற்கை வளத்தை பெருக்​கும் வகை​யில் இந்த தொடரில் அடிக்​கப்​படும் ஒவ்​வொரு கோலுக்​கும் தலா 10 மரக்​கன்​றுகள் நடப்பட உள்​ளன. இந்த போட்டி தொடர்​பான அறி​விப்பு நேற்று சென்​னை​யில் நடை​பெற்​றது. இதில் எம்​சிசி​யின் கவுர​வச் செய​லா​ளர் நிரஞ்​சன், மெட்​ராஸ் கிரிக்​கெட் கிளப் தலை​வர் விவேக் குமார் ரெட்​டி, ஒருங்​கிணைப்​புச் செய​லா​ளர் ராஜீவ் ரெட்​டி, முரு​கப்பா குழு​மம் சார்​பில் அருண் முரு​கப்​பன்​ உள்​ளிட்​டோர்​ கலந்​து கொண்​டனர்.