வங்கதேச அணிக்கு எதிரான டி20 கிரிக்கெட் தொடரை வென்று ஐக்கிய அரபு அமீகரம் சாதனை

ஷார்ஜா: வங்கதேச அணிக்கு எதிரான கடைசி மற்றும் 3-வது டி20 கிரிக்கெட் போட்டியில் 7 விக்கெட்கள் வித்தியாசத்தில் வெற்றி பெற்ற ஐக்கிய அரபு அமீரகம் அணி தொடரை 2-1 என கைப்பற்றி சாதனை படைத்தது.

வங்கதேச அணி, ஐக்கிய அரபு அமீரகத்தில் சுற்றுப்பயணம் செய்து விளையாடி வருகிறது. இரு அணிகள் இடையிலான கடைசி மற்றும் 3-வது டி20 கிரிக்கெட் போட்டி நேற்று முன்தினம் இரவு ஷார்ஜாவில் நடைபெற்றது. முதலில் பேட் செய்த வங்கதேச அணி 9 விக்கெட்கள் இழப்புக்கு 162 ரன்கள் எடுத்தது. ஒரு கட்டத்தில் வங்கதேச அணி 11 ஓவர்களில் 71 ரன்களுக்கு 7 விக்கெட்களை இழந்து தடுமாறியது.

தொடக்க வீரரான தன்ஸித் ஹசன் 18 பந்துகளில் 4 சிக்ஸர்கள், 4 பவுண்டரிகளுடன் சேர்த்த 40 ரன்களும், விக்கெட் கீப்பர் பேட்ஸமேனான ஜாகர் அலி 32 பந்துகளில், 3 சிக்ஸர்கள், ஒரு பவுண்டரியுடன் சேர்த்த 41 ரன்களுமே வங்கதேச அணி கவுரவமான ஸ்கோரை எட்ட உதவியது. ஐக்கிய அரபு அமீகர அணி தரப்பில் ஹைதர் அலி 3 விக்கெட்களை வீழ்த்தினார். மத்தியுல்லா கான், சாகிர் கான் ஆகியோர் தலா 2 விக்கெட்களை கைப்பற்றினர்.

163 ரன்கள் இலக்குடன் பேட் செய்த ஐக்கிய அரபு அமீரக அணி 19.1 ஓவர்களில் 3 விக்கெட்கள் இழப்புக்கு 166 ரன்கள் எடுத்து வெற்றி பெற்றது. அலிசான் ஷரஃபு 47 பந்துகளில், 3 சிக்ஸர்கள், 5 பவுண்டரிகளுடன் 68 ரன்களும், ஆசிப் கான் 26 பந்தகளில், 5 சிக்ஸர்களுடன் 41 ரன்களும் விளாசி ஆட்டமிழக்காமல் இருந்தனர். இந்த ஜோடி 4-வது விக்கெட்டுக்கு 87 ரன்கள் சேர்த்தது.

முன்னதாக கேப்டன் முகமது வசீம் 9, முகமது ஷோகைப் 29, ராகுல் சோப்ரா 13 ரன்களில் ஆட்டமிழந்தனர். 7 விக்கெட்கள் வித்தியாசத்தில் வெற்றி பெற்ற ஐக்கிய அரபு அமீரக அணி 3 ஆட்டங்கள் கொண்ட டி20 கிரிக்கெட் தொடரை 2-1 என கைப்பற்றி கோப்பையை வென்றது.

முதல் போட்டியில் வங்கதேச அணி 27 ரன்கள் வித்தியாசத்தில் வெற்றிருந்தது. தொடர்ந்து நடைபெற்ற 2-வது ஆட்டத்தில் ஐக்கிய அரபு அமீரக அணி 2 விக்கெட்கள் வித்தியாசத்தில் வெற்றி பெற்று பதிலடி கொடுத்திருந்தது. வங்கதேச அணிக்கு டி20 தொடரை ஐக்கிய அரபு அமீரக அணி வெல்வது இதுவே முதன்முறையாகும்.