வான்கடே மைதானத்தில் இன்று பலப்பரீட்சை: அபிஷேக் சர்மா அதிரடியை சமாளிக்குமா மும்பை அணி?

மும்பை: ஐபிஎல் டி20 கிரிக்​கெட் தொடரில் இன்று இரவு 7.30 மணிக்கு மும்பை வான்​கடே மைதானத்​தில் நடை​பெறும் ஆட்​டத்​தில் மும்பை இந்​தி​யன்​ஸ், சன்​ரைசர்ஸ் ஹைத​ரா​பாத் அணி​கள் மோதுகின்​றன.

5 முறை சாம்​பிய​னான மும்பை இந்​தி​யன்ஸ் நடப்பு சீசனில் 6 ஆட்​டங்​களில் விளை​யாடி 2 வெற்​றி, 4 தோல்வி​களு​டன் 4 புள்​ளி​கள் பெற்று பட்​டியலில் 7-வது இடத்​தில் உள்​ளது. கடைசி​யாக டெல்லி அணிக்கு எதி​ரான ஆட்​டத்​தில் 12 ரன்​கள் வித்​தி​யாசத்​தில் வெற்றி கண்​டிருந்​தது. மும்பை அணி​யின் நட்​சத்​திர பந்து வீச்​சாள​ரான ஜஸ்​பிரீத் பும்ரா காயத்​தில் இருந்து மீண்டு 3 மாதங்​களுக்​குப் பிறகு களத்​துக்கு திரும்பி உள்ள நிலை​யில் உயர்​மட்ட செயல் திறனை வெளிப்​படுத்​து​வ​தில் தடு​மாறி வரு​கிறார்.

பெங்​களூரு அணிக்கு எதி​ரான ஆட்​டத்​தில் விக்​கெட் ஏதும் கைப்​பற்​றாத பும்​ரா, டெல்லி கேப்​பிடல்ஸ் அணிக்கு எதி​ரான ஆட்​டத்​தில் யார்க்​கர்​களை வீசுவ​தில் தடு​மாற்​றம் அடைந்து 44 ரன்​களை விட்​டுக்​கொடுத்​திருந்​தார். 31 வயதான அவருக்கு இன்​றைய ஆட்​டம் சோதனை களமாக இருக்​கக்​கூடும். ஏனெனில் ஹைத​ரா​பாத் அணி கடந்த ஆட்​டத்​தில் 246 ரன்​கள் இலக்கை துரத்தி வெற்றி கண்​டிருந்​தது. டிரா​விஸ் ஹெட், அபிஷேக் சர்​மா, இஷான் கிஷன், ஹென்​ரிச் கிளாசன் ஆகியோரை உள்​ளடக்​கிய ஹைத​ரா​பாத் அணி​யின் தாக்​குதல் பேட்​டிங் வரிசை பும்​ரா​வுக்கு நெருக்​கடி கொடுக்​கக்​கூடும்.

இது ஒரு​புறம் இருக்க பேட்​டிங்​கில் முன்​னாள் கேப்​டன் ரோஹித் சர்​மா​வின் பார்ம் கவலை அளிக்​கும் வகை​யில் உள்​ளது. 5 ஆட்​டங்​களில் விளை​யாடி உள்ள அவர், 11.20 சராசரி​யுடன் 56 ரன்​களே எடுத்​துள்​ளார். இன்​றைய ஆட்​டத்​தில் ரோஹித் சர்மா பார்​முக்கு திரும்​புவ​தில் கூடு​தல் கவனம் செலுத்​தக்​கூடும். தொடக்க வீர​ரான ரியான் ரிக்​கெல்​டன், நடு​வரிசை பேட்​ஸ்​மே​னான திலக் வர்மா ஆகியோர் சீராக ரன்​கள் சேர்த்து வரு​கின்​றனர். இவர்​களிடம் இருந்து மேலும் ஒரு சிறந்த மட்டை வீச்சு வெளிப்​படக்​கூடும். சூர்​யகு​மார் யாதவ், நமன் திர் ஆகி​யாரும் நிலைத்​தன்​மை​யுடன் விளை​யாடும் பட்​சத்​தில் அணி​யின் பலம் அதி​கரிக்​கும்.

பாட் கம்​மின்ஸ் தலை​மையி​லான சன்​ரைசர்ஸ் ஹைத​ரா​பாத் அணி 6 ஆட்​டங்​களில் விளை​யாடி 2 வெற்றி 4 புள்​ளி​களு​டன் 9-வது இடத்​தில் உள்​ளது. ஹைத​ரா​பாத் அணி தனது கடைசி ஆட்​டத்​தில் 8 விக்​கெட்​கள் வித்​தி​யாசத்​தில் பஞ்​சாப் கிங்ஸ் அணியை தோற்​கடித்து இருந்​தது. அந்த ஆட்​டத்​தில் அபிஷேக் சர்மா 55 பந்​துகளில் 141 ரன்​களும், டிரா​விஸ் ஹெட் 37 பந்​துகளில் 66 ரன்​களும் விளாசி 246 ரன்​கள் இலக்கை எளி​தாக எட்ட உதவி​யிருந்​தனர்.

வான்​கடே மைதானத்​தில் கடந்த பிப்​ர​வரி மாதம் இங்​கிலாந்து அணிக்கு எதி​ராக நடை​பெற்ற டி 20 ஆட்​டத்​தில் இந்​திய அணி​யின் தொடக்க வீர​ராக களமிறங்​கிய அபிஷேக் சர்மா 135 ரன்​களை விளாசி மிரட்​டி​யிருந்​தார். இதனால் அவர், மும்பை அணி​யின் பந்து வீச்​சாளர்​களுக்கு நெருக்​கடி கொடுக்​கக்​கூடும் என எதிர்​பார்க்​கப்​படு​கிறது. தொடக்க வீரர்​களுக்கு அடுத்​த​படி​யாக இஷான் கிஷன், ஹென்​ரிச் கிளாசன், நித்​திஷ் குமார் ரெட்டி ஆகியோ​ரும் தாக்​குதல் ஆட்​டம்​ மேற்​கொள்​ளக்​கூடியவர்​களாக ​திகழ்​கின்​றனர்​.