ஈஷா யோகா மையம் சார்பில் நடத்தப்பட்ட 16-வது கிராமோத்சவ விளையாட்டு திரு​விழா நிறைவு

கோவை: ஈஷா யோகா மையம் சார்​பில் நடத்​தப்​பட்ட 16-வது கிராமோத்சவ விளை​யாட்டுத் திரு​விழா நேற்று நிறைவடைந்தது.

ஈஷா சார்​பில் கிராமோத்​சவம் விளை​யாட்டுத் திரு​விழா நடப்பு மாதம் தொடங்​கியது. முதல்​கட்ட போட்​டிகள் தமிழ்​நாடு, ஆந்திரா, தெலங்​கானா, கர்நாடகா, கேரளா, புதுச்​சேரி மாநிலங்​களில் 162 இடங்​களில் நடத்​தப்​பட்டன. இதில் 5 ஆயிரம் அணிகளைச் சேர்ந்த 43,144 வீரர், வீராங்​கனைகள் பங்கேற்​றனர்.

ஆண்களுக்கான வாலிபால், பெண்​களுக்கான த்ரோபால் போட்​டிகளில் தேர்வான அணிகளுக்கு இடையேயான மண்டல அளவிலான போட்​டிகள் 6 இடங்​களில் நடத்​தப்​பட்டன. இவற்றில் 136 அணிகளும், 1,000-க்​கும் மேற்​பட்ட வீரர்​களும் பங்கேற்​றனர். தொடர்ந்து அரையிறு​திப் போட்​டிகள் கோவை ஈஷா ஆதியோகி சிலை முன்பு நடைபெற்​றது. தென்னிந்திய அளவிலான இறுதிப் போட்டி நேற்று ஈஷா நிறு​வனர் சத்குரு முன்னிலை​யில் நடைபெற்​றது.

ஆண்களுக்கான வாலிபால் இறுதிப் போட்​டி​யில் கர்நாடக மாநிலம் பனகல் கிராமத்​தைச் சேர்ந்த ‘அலிப் ஸ்டார்’ அணி, உடுப்பி மாவட்​டத்​தைச் சேர்ந்த பள்ளி பிரண்ட்ஸ் அணி ஆகியவை முதலிரண்டு இடங்​களைப் பிடித்தன. பெண்​களுக்கான த்ரோபால் இறுதிப் போட்​டி​யில், கர்நாடக மாநிலம் மார்​கோடு கிராமத்து அணி, தமிழகத்​தின் புள்​ளாக்​க​வுண்​டன்​புதூர் கிராம அணி ஆகியவை முதலிரண்டு இடங்​களைப் பிடித்தன.

மாற்றுத் திறனாளி​களுக்காக நடத்​தப்​பட்ட வாலிபால் போட்​டிகளில் கோவை, கிருஷ்ணகிரி அணிகள் முதலிரண்டு இடத்தை பிடித்தன. முன்ன​தாக, நேற்று நடந்த இறுதிப் போட்​டிகளை சத்குரு தொடங்கி​வைத்​தார்.

வெற்றி பெற்ற அணிகளுக்கு சத்குரு, இந்திய கிரிக்​கெட் அணியின் முன்​னாள் வீரர்கள் வீரேந்திர சேவாக், வெங்​கடேஷ் பிரசாத், பாரா ஒலிம்​பிக் வீரர்கள் மாரியப்பன் தங்கவேலு, துளசிமதி, பண்ணாரி அம்மன் குழுமத் தலைவர் பாலசுப்​பிரமணியன் ஆகியோர் பரிசுகளை வழங்​கினர். இந்நிகழ்​வில் சத்குரு பேசும்​போது, “நம்​மிட​முள்ள புத்​திசாலித்​தனம், திறமை, உறுதி உள்ளிட்ட அம்சங்கள் சிறப்​பாக செயல்பட நாம் புத்​துணர்​வுட​னும், உற்சாக​மாக​வும் இருக்க வேண்​டும். கிராமப்புற வீரர்​களிடையே புத்​துணர்வை ஏற்படுத்​தும் நோக்​கில் கிராமோத்​சவம் நடத்​தப்​படு​கிறது” என்றார்.

தொடரில் முதலிடம் பிடித்த அணிகளுக்கு ரூ.5 லட்சம், இரண்​டா​மிடம் பிடித்த அணிகளுக்கு ரூ.3 லட்சம், 3, 4-வது இடம் பிடித்த அணிகளுக்கு தலா ரூ.1 லட்சம் பரிசாக வழங்​கப்​பட்டன.