உலக டெஸ்ட் சாம்பியன்ஷிப்: தென் ஆப்பிரிக்க அணி முதலிடம்

இலங்கை அணிக்கு எதிரான டெஸ்ட் தொடரை 2-0 என கைப்பற்றியதன் மூலம் தென் ஆப்பிரிக்க அணி ஐசிசி உலக டெஸ்ட் சாம்பியன்ஷிப் புள்ளிகள் பட்டியலில் 63.33 சராசரி புள்ளிகளுடன் முதலிடத்துக்கு முன்னேறியது. இதன் மூலம் அந்த அணி இறுதிப் போட்டிக்கு முன்னேறும் வாய்ப்பை நெருங்கி உள்ளது. அடுத்ததாக தென் ஆப்பிரிக்க அணி தனது சொந்த மண்ணில் பாகிஸ்தானுக்கு எதிராக 2 டெஸ்ட் போட்டிகள் கொண்ட தொடரில் விளையாட உள்ளது.

இதில் ஒரு ஆட்டத்தில் வெற்றி பெற்றாலே தென் ஆப்பிரிக்க அணி இறுதிப் போட்டிக்கு தகுதி பெற்றுவிடும். மாறாக 2 ஆட்டங்களிலும் வெற்றி பெற்றால் புள்ளிகள் பட்டியலில் முதலிடத்தை தக்கவைத்துக் கொள்ளும். ஆஸ்திரேலிய அணிக்கு எதிரான 2-வது டெஸ்ட் போட்டியில் தோல்வி அடைந்துள்ள இந்திய அணி, மற்ற அணிகளின் வெற்றி, தோல்விகளுக்காக காத்திருக்காமல் இருக்க வேண்டுமானால் ஆஸ்திரேலியாவுக்கு எதிராக டெஸ்ட் தொடரில் எஞ்சியுள்ள 3 ஆட்டங்களில் 2 வெற்றியையும், ஒரு டிராவையும் பதிவு செய்ய வேண்டும். இது நிகழ்ந்தால் எந்தவித சிக்கலும் இன்றி இறுதிப் போட்டிக்கு முன்னேறலாம்.