சமூக, ஆன்மிக முன்னேற்றத்துக்காக அனைவரும் ஒற்றுமையாக உழைக்க வேண்டும்: ஸ்ரீ விஜயேந்திர சரஸ்வதி சுவாமிகள் அருளுரை

சென்னை / பெங்​களூரு: சமூக மற்றும் ஆன்மிக முன்னேற்​றத்​துக்​காக, தன்னலம் கருதாமல் அனைவரும் ஒற்றுமையாக உழைக்க வேண்​டும் என்று காஞ்சி காமகோடி பீடத்​தின் மடாதிபதி ஸ்ரீ விஜயேந்திர சரஸ்வதி சுவாமிகள் தனது அருளுரை​யில் கூறி​யுள்​ளார்.

அகில கர்நாடக பிராமண மகாசபா​வின் பொன்​விழா கொண்​டாட்​டத்​தின் ஒருபகு​தியாக பெங்​களூரு நகர் பெல்​லாரி சாலை​யில் உள்ள பேலஸ் மைதானத்​தில், பிராமண மகா சம்மேளனம், கடந்த 18, 19-ம் தேதிகளில் நடைபெற்​றது. இவ்விழாவை முன்னிட்டு, கடந்த 17-ம் தேதி மாலை காயத்ரி மகா யாக கலசம் பிரதிஷ்டை செய்​யப்​பட்டு, காயத்ரி ஜபம் தொடங்​கியது.

ஜன. 18-ம் தேதி காலை நடைபெற்ற காயத்ரி மகா யாகத்​தில் சிருங்​கேரி மடத்​தின் இளைய சங்க​ராச்​சார்யா ஜகத்​குரு ஸ்ரீ விதுசேகர பாரதி சுவாமிகள் பங்கேற்று அனுக்​கிரகபாஷணம் அருளினார். மாலை நடைபெற்ற நிகழ்ச்​சி​யில் மத்திய அமைச்​சர்கள் ராஜ்நாத் சிங், நிதின் ஜெயராம் கட்கரி, பிரகலாத் ஜோஷி, ஹெச்​.டி.கு​மாரசாமி, ராஜஸ்​தான் முதல்வர் பஜன்​லால் சர்மா உள்ளிட்​டோர் பங்கேற்​றனர்.

ஜன. 19-ம் தேதி மாலை நடைபெற்ற நிகழ்ச்​சி​யில் காஞ்சி சங்கரமடத்​தின் பீடா​திபதி ஸ்ரீ விஜயேந்திர சரஸ்வதி சுவாமிகள் இணைய​வழி​யில் அனுக்​கிரகபாஷணம் வழங்​கினார். அப்போது அவர் பேசி​ய​தாவது: யாகம் வளர்த்து பூஜைகள் செய்​வ​தால் எண்ணம் தூய்மை பெறுகிறது. கல்வி வளர்ச்சி, வேதம் பயிலுதல் உள்ளிட்​ட​வற்றில் நாம் அதிக கவனம் செலுத்த வேண்​டும். கோயில்​களில் விதிக்​கப்​பட்​டுள்ள ஆடை கட்டுப்​பாட்டை அனைவரும் கடைபிடிக்க வேண்​டும். சமூக மற்றும் ஆன்மிக முன்னேற்​றத்​துக்​காக, தன்னலம் கருதாமல் அனைவரும் ஒற்றுமையாக உழைக்க வேண்​டும். வலிமையான இந்தியாவை உருவாக்க அனைவரும் பாடு​படு​வோம்” என்றார்.

இந்நிகழ்ச்​சி​யில் 5,000-க்​கும் மேற்​பட்ட பக்தர்கள் பங்கேற்​றனர். நிகழ்ச்சி ஏற்பாடுகளை மகாசபா​வின் தலைவர் அசோகா ஹரணஹல்லி, பொதுச்செயலாளர் எஸ்.ஸ்ரீதர்​மூர்த்தி, பொருளாளர் வெங்​கடேஷ் எஸ்.நாயக் உள்ளிட்ட நிர்​வாகிகள் செய்திருந்தனர்.