10 புதிய மலையாள க்ரைம் த்ரில்லர் படங்கள் @ ஓடிடி - ‘தலவன்’ முதல் ‘பணி’ வரை | OTT Pick

ஓடிடி தளங்களில் ஸ்ட்ரீம் ஆகும் 2024-ல் வெளிவந்த 10 மலையாள க்ரைம் த்ரில்லர் படங்கள் குறித்து பார்ப்போம். இதில் மலையாள சினிமாவின் முன்னணி நடிகர்களாக உள்ள மம்மூட்டி, டோவினோ தாமஸ், நஸ்ரியா, ஜோஜு ஜார்ஜ் நடித்துள்ள படங்களும் இடம்பெற்றுள்ளன.

சூக்‌ஷமதர்ஷினி (Sookshmadarshini): இது ஒரு மிஸ்டரி த்ரில்லர் திரைப்படம். இதில் பிரதான கதாபாத்திரமான பிரியா தனது பக்கத்து வீட்டுக்காரர் மேனுவேலின் செயல்களை சந்தேகிக்கிறார். இதை துப்பறியத் தொடங்கும்போது நிகழும் திருப்பங்களே திரைக்கதை. பிரதான பாத்திரங்களில் நஸ்ரியா, பசில் ஜோசப் நடித்துள்ளனர். டிஸ்னி பிளஸ் ஹாட் ஸ்டார் ஓடிடி தளத்தில், இப்படம் காணக் கிடைக்கிறது.

தலவன் (Thalavan): ஜிஸ் ஜாய் இயக்கத்தில் வெளிவந்த இன்வெஸ்டிகேஷன் த்ரில்லர் திரைப்படம் ‘தலவன்’. இதில் ஜெய்சங்கர் கதாபாத்திரத்தில் பிஜு மேனனும், கார்த்திக் கதாபாத்திரத்தில் ஆசிஃப் அலியும் நடித்துள்ளனர். ஒரே காவல் நிலையத்தில் பணிபுரியும் இவ்விரு காவல் துறை அதிகாரிகளுக்கும் இடையேயான ஈகோவும், அதனால் ஏற்படும் மோதலும் படத்தை எங்கேஜிங்காக நகர்தியிருக்கும். ஜெய்சங்கரின் வீட்டில் ஒருநாள் பெண்ணின் சடலமொன்று கண்டெடுக்கப்படுகிறது. இந்த வழக்கின் விசாரணை கார்த்திக்கிடம் ஒப்படைக்கப்படுகிறது. இது இவ்விருவருக்கும் இடையேயான மோதலை தீவிரப்படுத்துகிறது. இந்தப் படம் சோனி லிவ் ஓடிடி தளத்தில் காணக்கிடைக்கிறது. க்ரைம் த்ரில்லர் படங்களை விரும்புகிறவர்களுக்கு இந்தப் படம் நிச்சயம் பிடிக்கும்.

கிஷ்கிந்தா காண்டம் (Kishkindha kandam): ஒளிப்பதிவாளர் பாகுல் ரமேஷ் எழுதி, தின்ஜித் அய்யதன் இயக்கிய சைக்கலாஜிக்கல் க்ரைம் த்ரில்லர் திரைப்படம் ‘கிஷ்கிந்தா காண்டம்’. இப்படத்தின் முக்கிய கதாபாத்திரங்களில் ஆசிஃப் அலி, அபர்ணா பாலமுரளி, விஜயராகவன் உள்ளிட்ட பலர் நடித்துள்ளனர். ஓய்வு பெற்ற முன்னாள் ராணுவ வீரரான அப்பு பிள்ளை மற்றும் அவரது குடும்பத்தை சுற்றி இப்படத்தின் கதை நகர்கிறது. அப்பு பிள்ளையின் இரண்டாவது மகன் அஜய் சந்திரன், அவரது மனைவி அபர்ணா உள்ளிட்டோர் வாழும் அந்த வீட்டில் அப்பு பிள்ளையின் துப்பாக்கி மாயமாகிறது. இந்தத் தேடலில், அக்குடும்பத்தினரால் நீண்ட நாட்களாக மறைக்கப்பட்டு வரும் ரகசியம் வெளிச்சத்துக்கு வருகிறது. இந்தப் படம் டிஸ்னி பிளஸ் ஹாட் ஸ்டார் ஓடிடி தளத்தில் காணக் கிடைக்கிறது.

அன்வேஷிப்பின் கண்டேதும் (Anweshippin Kandethum): கேரளாவின் கோட்டயம் காவல் நிலையத்தில் உதவி ஆய்வாளராக நியமிக்கப்படுகிறார் ஆனந்த் நாராயணன் (டோவினோ தாமஸ்). புதிதாக பணியில் சேர்ந்த அவர், ஓர் இளம்பெண் காணாமல் போன வழக்கை விசாரிக்கிறார். விசாரணையில், இந்த வழக்கில் பொய்யான குற்றவாளி மீது குற்றம்சாட்ட முயற்சிக்கிறார்கள். ஆனால், ஆனந்த் நாராயணன் உண்மையை வெளிக்கொண்டுவர போராடுகிறார். இதனால் அவர் சந்திக்கும் பிரச்சினைகளையும், அதை அவர் எதிர்கொள்ளும் விதத்தையும் பேசும் க்ரைம் த்ரில்லர் படம்தான் ‘அன்வேஷிப்பின் கண்டேதும்’. டார்வின் குரியகோஸ் இயக்கத்தில் வெளிவந்த இப்படத்தை நெட்ஃப்ளிக்ஸ் ஒடிடி தளத்தில் காணலாம்.

கோளம் (Koalm): பிரவீன் விஸ்வநாத் உடன் திரைக்கதையை இணைந்து எழுதி அறிமுக இயக்குநர் சம்ஜத் இயக்கியிருக்கும் படம் ‘கோளம்’. வி டெக் இண்டர்நேஷ்னல் என்ற ஐடி கம்பெனியின் மேலாளர் ஐசக் ஜான் (திலீஷ் போத்தன்) தனது அலுவலக கழிவறையில் இறந்து கிடக்கிறார். இது இயற்கை மரணம் என்று கூறப்படுகிறது. ஆனால், வழக்கை விசாரிக்க வரும் உதவி காவல் கண்காணிப்பாளர் சந்தீப் கிருஷ்ணா (ரஞ்சித் சஜீவ்) இது கொலை என்று சந்தேகிக்கிறார். இதைத் தொடர்ந்து அந்த அலுவலகத்தின் பணியாளர்கள் ஒவ்வொருவரிடமும் விசாரணை மேற்கொள்கிறார். இந்த விசாரணை சுவாரசியத்தை தருவதோடு, படத்தை விறுவிறுப்பாக்கி நகர்த்துகிறது. இப்படத்தை அமேசான் பிரைம் ஓடிடி தளத்தில் காணலாம்.

பூகன்வில்லா (Bougainvillea): அமல் நீரத் இயக்கத்தில் வெளியான சைக்கலாஜிக்கல் க்ரைம் த்ரில்லர் திரைப்படம் ‘பூகன்வில்லா’. லாஜோ ஜோஸ் எழுதிய ‘ரூதின்டே லோகம்’ என்ற நாவலை தழுவி எடுக்கப்பட்டது. இப்படத்தின் முன்னணி கதாபாத்திரத்தில் குஞ்சாக்கோ போபன், ஜோதிர்மயி, ஃபஹத் ஃபாசில் உள்ளிட்ட பலர் நடித்துள்ளனர். டாக்டர் ராய்ஸ் மற்றும் அவரது மனைவி ரீது இடுக்கி மலைப் பகுதிகளில் வசித்து வருகிறார்கள். எட்டு ஆண்டுகளுக்கு முன் நடந்த கார் விபத்தால் ஏற்படும் மறதி நோயால் ரீது அவதிப்படுகிறார். இந்த நோயின் தாக்கத்தால், அவர் தொடர்ந்து பூகன்வில்லா மலர்களையே வரைந்து வருகிறார். வழக்கொன்றின் விசாரணைக்காக ரீதுவை காவல் துறை அதிகாரி ஜோசப் விசாரிக்க, படம் வேகமெடுக்கிறது. இந்த விசாரணையின் முடிவில் டாக்டர் ராய்ஸ் மற்றும் ரீதுவின் வாழ்க்கையில் என்ன நடக்கிறது என்பதுதான் இப்படத்தின் கதை. இப்படத்தை சோனி லிவ் ஒடிடி தளத்தில் காணலாம்.

பிரம்மயுகம் (Bramayugam): ராகுல் சதாசிவன் இயக்கத்தில், மம்மூட்டி முதன்மை கதாபாத்திரத்தில் நடித்து வெளியான ஹாரர் - த்ரில்லர் திரைப்படம் ‘பிரம்மயுகம்’. 17-ம் நூற்றாண்டில் நடக்கும் மர்மங்களைக் கொண்டதுதான் இந்தப் படம். கொடுமன் பொட்டி கதாபாத்திரத்தில் மம்மூட்டி நடித்திருக்கிறார். அவர் தனது சுயநலனுக்காக மந்திர, தந்திரங்களைப் பயன்படுத்துகிறார். தேவன் என்ற பாணன் கதாபாத்திரத்தில் அர்ஜுன் அசோகன் நடித்துள்ளார். மர்மமான இருண்ட உலகத்தில் தேவன் சிக்கிக்கொள்கிறார். கொடுமான் பொட்டியிடம் இருந்து தேவன் எப்படி தப்பிச் செல்கிறார் என்பதே இப்படத்தின் கதை. இப்படம் சோனி லிவ் ஒடிடி தளத்தில் காணக் கிடைக்கிறது.

பணி (Pani): ஜோஜு ஜார்ஜ் இயக்கத்தில் உருவான ஆக்‌ஷன் த்ரில்லர் திரைப்படம் ‘பணி’. ஜோஜு ஜார்ஜ், அபிநயா, சாகர் சூர்யா உள்ளிட்ட பலர் முக்கிய கதாபாத்திரத்தில் நடித்துள்ளனர். திரிச்சூரில் வாழும் தொழிலதிபர் கிருஷ்ணனின் வாழ்க்கையில் நடக்கும் அசம்பாவிதத்தின் அடிப்படையில் எடுக்கப்பட்டுள்ளது. எதிர்மறை கதாபாத்திரத்தில் வரும் இளைஞர்கள் இருவர் கையிலெடுக்கும் வன்முறை, கிருஷ்ணனின் வாழ்க்கையில் என்ன மாதிரியான விளைவுகளை ஏற்படுத்துகிறது என்பதுதான் படத்தின் கதை. அமைதியாக நகரும் குடும்பத்தில் நுழையும் எதிர்பாராத மனிதர்களால் ஏற்படும் வெறுக்கத்தக்க சம்பவங்கள், அதனால் ஏற்படும் வன்முறையின் விளைவுகளே படத்தின் கருப்பொருள். இந்தப் படத்தை சோனி லிவ் ஓடிடி தளத்தில் காணலாம்.

ஆபிரஹாம் ஓஸ்லர் (Abraham ozler): மிதுன் மனுவேல் தாமஸ் இயக்கத்தில் ஜெயராம், அனஸ்வரா ராஜன், அர்ஜுன் அசோகன், அனூப் மேனன், ஜகதீஷ், சைஜீ குருப், செந்தில் மற்றும் மம்மூட்டி ஆகியோர் முக்கிய கதாபாத்திரத்தில் நடித்து வெளியான த்ரில்லர் திரைப்படம் ‘ஆபிரஹாம் ஓஸ்லர்’. ஒரு சிக்கலான குற்ற வழக்கை ஆராயும் ஒரு போலீஸாரின் விசாரணை முயற்சிகளைப் பற்றி இப்படம் பேசுகிறது. ஒரு மர்மமான கொலை வழக்கு மற்றும் அதனைத் தொடர்ந்து வரும் சிக்கலான விசாரணைகளும்தான் இந்த படத்தின் கதை. டிஸ்னி பிளஸ் ஹாட்ஸ்டார் ஓடிடி தளத்தில் இப்படத்தை காணலாம்.

ஹன்ட் (Hunt): ஷாஜி கைலாஷ் இயக்கத்தில் பாவனா, ரெஞ்சி பனிக்கர், அனு மோகன், அதிதி ரவி மற்றும் சந்துநாத் ஆகியோர் முக்கிய கதாபாத்திரத்தில் நடித்து வெளியான த்ரில்லர் திரைப்படம் ‘ஹன்ட்’. மருத்துவ கல்லூரியில் டாக்டர் கீர்த்தி (பாவனா) ஒரு கேஸை ஆராய்கிறார். அந்த மர்மமான கேஸில் எதிர்பாராத திருப்பங்கள் உருவாக்குகிறது. இப்படம், மருத்துவத் துறை உளவியல் மற்றும் குற்றங்களை மையமாக கொண்டது. அமேசான் பிரைம் வீடியோவில் இப்படம் காணக் கிடைக்கிறது.