குடியேற்ற மசோதா 2025 | சொல்... பொருள்... தெளிவு

ஒரு நாட்டின் பாதுகாப்பைப் பொறுத்தவரை, அதன் எல்லைக்குள் யார், எப்போது நுழைகிறார்கள், எவ்வளவு காலம் தங்குகிறார்கள், அவர்கள் வந்ததன் நோக்கம் போன்றவற்றை அரசு அறிந்துகொள்வது அவசியம். ​முறை​கேடான வர்த்​தகம், சட்டவிரோதக் குடியேற்றம், ஆயுதம், வெடிமருந்து ஊடுருவல், போதைப்​பொருள் கடத்தல் போன்றவை இந்தியாவின் பாதுகாப்​புக்கு நீண்ட​காலமாக அச்சுறுத்தலாக இருந்து​வரு​கின்றன.

அந்த வகையில் இந்தியா​வுக்கு வருகை தரும் வெளிநாட்​டினரின் வருகையை நெறிப்​படுத்தப் புதிய குடியேற்ற மசோதா 2025-ஐ நாடாளு​மன்​றத்தில் மத்திய அரசு தாக்கல் செய்துள்ளது. வெளிநாட்​டினரின் இந்திய வருகையை இந்த மசோதா ஒழுங்குபடுத்துகிறது.

முந்தைய சட்டங்கள்: இந்தியா​வுக்கு ஏப்ரல் 1, 2023 முதல் மார்ச் 31, 2024 வரை, சுமார் 98.40 லட்சம் வெளிநாட்​டினர் வருகை தந்துள்ளனர். இவ்வாறு வருகை தரும் வெளிநாட்​ட​வருக்குப் பல்வேறு கட்டுப்​பாடுகளை விதிப்பதன் மூலம் விதிமீறல்​களைக் கட்டுப்​படுத்த முடியும் என அரசு நம்பு​கிறது.

இந்தியா​வுக்குள் வெளிநாட்​டினரின் வருகையை முறைப்​படுத்த நடைமுறையில் பாஸ்போர்ட் சட்டம்​-1920 (The Passport Act of 1920), வெளிநாட்​டினர் பதிவுச் சட்டம் - 1939 (1939 Registration of Foreigners Act), வெளிநாட்​டினர் சட்டம் - 1946 (The Foreigners Act of 1946), குடியேற்றச் சட்டம்​-2000 (Immigration Act, 2000) போன்றவை அமலில் உள்ளன.

இந்நிலை​யில், தற்போது தாக்கல் செய்யப்​பட்​டுள்ள ‘புதிய குடியேற்ற மசோதா 2025’ மேற்குறிப்​பிட்​டுள்ள பழைய சட்டங்​களுக்கு மாற்றாக​வும், குடியேற்​றத்​துக்கான ஒருங்​கிணைந்த பாதுகாப்பான கட்டமைப்​பாகவும் கருதப்​படு​கிறது. புதிய குடியேற்றச் சட்டம், வெளிநாட்டவர் இந்தியாவில் சட்ட விரோதமாக நுழைவதைத் தடுக்​கிறது; சுற்றுலா, மருத்​துவம், கல்வி சார்ந்து இந்தியா​வுக்குள் பயணிக்க விரும்பும் வெளிநாட்​ட​வரின் விசாவையும் எளிதாக்கு​கிறது.

விசா செயல்​முறையை எளிதாக்க, இந்தியத் தூதரகங்கள் நேரடியாக விசாக்களை வழங்கு​கின்றன. அதேநேரத்​தில், குடியேற்றப் பணியகம் மூலம் 167 நாடுகளைச் சேர்ந்த குடிமக்​களுக்கு மின்-​வி​சாக்​களும் தொடர்ந்து வழங்கப்​படு​கின்றன.

முக்கிய அம்சங்கள்: வெளிநாட்​டினரைச் சுற்றுலாப் பயணிகள், மாணவர்கள், தொழிலா​ளர்கள், வணிகர்கள், அகதிகள்- புகலிடம் கோருபவர்கள், சட்டவிரோத​மாகக் குடியேறிய​வர்கள் என ஆறு பிரிவு​களாகப் புதிய குடியேற்ற மசோதா வகைப்​படுத்து​கிறது. இந்த ஒவ்வொரு பிரிவுக்கும் விசா தேவை, தங்கி​யிருக்கும் காலம், விசாவைப் புதுப்​பிப்​ப​தற்கான நிபந்​தனைகள் பற்றிய விதிகள் புதிய மசோதாவில் இடம்பெற்றுள்ளன.

புதிய குடியேற்றச் சட்டத்​தில், அனைத்து விசா விண்ணப்​ப​தா​ரர்​களும் குற்ற​வியல் பதிவுச் சோதனைக்கு உட்படுத்​தப்​படுவர். அதன்படி கல்வி, மருத்​துவச் சிகிச்சை, ஆராய்ச்சி, வேலைவாய்ப்பு ஆகியவற்றின் கீழ் நீண்ட கால விசாக்​களில் (180 நாட்களுக்கு மேல்) இந்தியா வரும் வெளிநாட்​டினர், 14 நாட்களுக்குள் வெளிநாட்​டினர் மண்டலப் பதிவு அலுவல​கத்தில் (FRRO- Foreigners Regional Registration Office) பதிவுசெய்ய வேண்டும்.

பாகிஸ்​தானியக் குடிமக்களாக இருந்தால் 24 மணி நேரத்​துக்குள் பதிவுசெய்​து​கொள்ள வேண்டும். பதிவுச் செயல்​பாட்டில் முகவரி விவரங்கள், உள்ளூர் தொடர்​புகள், இந்தியாவில் தங்கு​வதற்கான நோக்கம் போன்ற தகவல்களை வழங்க வேண்டும். வெளிநாட்​ட​வர்கள் தங்கி​யிருக்கும் காலம், குறிப்​பிட்ட காலத்தைத் தாண்டிச் சென்றால், உள்ளூர் அதிகாரி​களைத் தொடர்​பு​கொள்ள வேண்டும்.

இந்திய விசாக்களை இணையம்வழி, இந்தியத் தூதரகங்கள் மூலம் தாக்கல் செய்து பெற்றுக்​கொள்​ளலாம். விசாவுக்குத் தேவையான ஆவணங்கள் வெளிநாட்டவர் விண்ணப்​பிக்கும் வகையைப் பொறுத்தது. குறிப்பாக, ஒருவர் நீண்ட காலம் இந்தியாவில் தங்க விருப்பம் கொண்டால், அவர்களுக்கான விசாக்​களுக்கு பயோமெட்ரிக் தரவு - கைரேகைகள் - முக அங்கீ​காரம் போன்றவை தேவை.

கட்டுப்​பாடுகள்: வெளிநாட்டவர் வழங்கிய தகவல்​களில் ஏதேனும் மாற்றம் இருந்​தால், உதாரணத்​துக்கு முகவரி மாற்றம், வேலையின் நிலை, பல்கலைக்கழக இடமாற்றம் போன்ற​வற்றை வெளிநாட்​ட​வருக்கான மண்டலப் பதிவு அலுவல​கத்தில் தெரிவிக்க வேண்டும். மாற்றங்​களைத் தெரிவிக்கத் தவறினால், சம்பந்தப்பட்ட நபர் அபராத விதிப்பு அல்லது நாடுகடத்தும் நடவடிக்கைக்கு உள்ளா​வார். பல்கலைக்​கழகங்கள், கல்வி நிறுவனங்கள், ஹோட்டல்கள், மருத்​துவ​மனை​களில் விசா முடிந்து தங்கி​யுள்ள வெளிநாட்​டினர் குறித்த விவரங்கள் குடியேற்ற அதிகாரி​களிடம் தெரிவிக்​கப்பட வேண்டும்.

வேலைவாய்ப்பு, வணிக நடவடிக்கை​களில் சுற்றுலாப் பயணிகள், வெளிநாட்டு மாணவர்கள் ஈடுபட முடியாது. விசா வைத்திருப்பவர் குற்றச் செயல்கள் அல்லது மோசடியில் ஈடுபட்​டால், விசா ரத்து செய்யப்​படும். போலி ஆவணங்​களைப் பயன்படுத்தி விசா பெறப்​பட்​டாலோ, சம்பந்தப்பட்ட நபர் தேசியப் பாதுகாப்​புக்கு அச்சுறுத்தலாக இருப்​ப​தாகக் கண்டறியப்​பட்டாலோ அல்லது அனுமதிக்​கப்பட்ட காலத்​துக்கு மேல் தங்கி​யிருந்தாலோ விசா ரத்து செய்யப்​படும்.

தண்டனைகள்: முறையான ஆவணங்கள் இல்லாமல் இந்தியா​வுக்குள் நுழைபவர்கள், விசா காலம் முடிந்தும் தங்கி​யிருப்​பவர்கள் சட்டவிரோத​மாகக் குடியேறிய​வர்​களாகக் கருதப்​படு​வார்கள். புதிய குடியேற்றச் சட்டத்தின் மூலம், சட்டவிரோதக் குடியேறிகளைத் தடுத்து வைக்க​வும், நாடு கடத்த அல்லது இந்தியா​வுக்குள் நுழைவதைத் தடுக்கும் வகையிலும் தடுப்புப் பட்டியலில் சேர்ப்​ப​தற்கான அதிகாரம் அதிகாரி​களுக்கு வழங்கப்​பட்​டுள்ளது.

இந்தியா​வுக்குள் நுழையும் அல்லது வெளியேறும் அனைத்து நபர்களும் முறையான பாஸ்போர்ட்டை வைத்திருக்க வேண்டும், வெளிநாட்​டினருக்கு விசா அல்லது பிற பரிந்துரைக்​கப்பட்ட பயண ஆவணங்களை வைத்திருக்க வேண்டும்; இதைக் குடியேற்ற அதிகாரிகள் ஆய்வுசெய்வர்.

போலி பாஸ்போர்ட், விசா பயன்படுத்தி இந்தியா​வுக்குள் நுழைந்து தங்கி, வெளியே சென்றது கண்டு​பிடிக்​கப்​பட்டால் அந்த நபருக்கு ஏழு ஆண்டு சிறையும், 10 லட்சம் ரூபாய் அபராதமும் விதிக்​கப்​படும். மேலும் விமானம், கப்பல் நிறுவனங்கள் இந்தியா​வுக்கு வரும் வெளிநாட்டுப் பயணிகளின் விவரங்களை விமானம் வருவதற்கு முன்பு குடியேற்ற அதிகாரி​களிடம் சமர்ப்​பிக்க வேண்டும்.

ஆவணமற்ற நபர்களை ஏற்றிச் செல்லும் நிறுவனங்​களுக்கும் ரூ.5 லட்சம் வரை அபராதம் விதிக்​கப்​படும். சட்டவிரோதமாக மீண்டும் நுழைய முயல்​பவர்​களுக்கு 10 ஆண்டுகள் வரை சிறைத் தண்டனை​யும், இந்தியா வருவதற்கு வாழ்நாள் தடையும் விதிக்​கப்​படும்.

விமர்​சனங்கள்: குடியேற்றச் சட்ட மசோதாவில் உள்ள சில விதிமுறைகள் மிகவும் கடுமையாக இருப்​ப​தால், வெளிநாட்டவர் மீது இவற்றை அதிகாரிகள் தவறாகப் பயன்படுத்து​வதற்கான வாய்ப்புகள் உள்ளன; குறிப்​பிட்ட மதம், சமூகக் குழுக்​களைச் சேர்ந்​தவர்கள் இதனால் பாதிக்​கப்படக் கூடும். புதிய குடியேற்ற மசோதா வெளிநாட்டுப் பத்திரி​கை​யாளர்கள், சமூகச் செயல்​பாட்​டாளர்கள், அகதிகளை (உதாரணமாக, இலங்கைத் தமிழர்கள்) கடுமை​யாகப் பாதிப்​பதுடன் இந்தியா​வுக்கு வரும் வெளிநாட்​ட​வரின் எண்ணிக்கை​யையும் பெருமளவு குறைக்கும் என எதிர்க்​கட்​சிகள் விமர்​சித்​துள்ளன.