வறுமையிலிருந்து மீள்கிறதா இந்தியா?

உலகளவில் 70 கோடி பேர் வறுமைக்கோட்டுக்குக் கீழ் இருப்பதாக உலக வங்கியின் அறிக்கை தெரிவிக்கிறது. இந்தியாவில் கடந்த 9 வருடங்களில் 25 கோடி பேர் வறுமையிலிருந்து மீண்டுள்ளதாக நிதி ஆயோக் அறிக்கை தெரிவித்துள்ள நிலையில், வரலாற்றில் முதல் முறையாக 2024இல் நாட்டின் வறுமை விகிதம் 5%க்கும் கீழே சென்றுள்ளதாக பாரத் ஸ்டேட் வங்கியின் ஆய்வும் சுட்டிக்காட்டியிருக்கிறது.

பட்டினி ஒழிப்பு, வறுமை​யின்மை, ஆரோக்​கியம், கல்வி, பாலினச் சமத்துவம் உள்ளிட்ட பல்வேறு இலக்குகளை ஒரு நாட்டின் நிலைத்த வளர்ச்​சிக்கான பாதையாக ஐக்கிய நாடுகள் அவை நிர்ண​யித்​திருக்​கிறது. அதன்படி இந்தியா பயணிக்​கிறதா என்பது முக்கியமான கேள்வி.

மாநிலங்கள் நிலவரம்: சுகாதாரம், நிதி சேவை, குடிநீர், மின்சாரம், ஊட்டச்​சத்து, சமையல் எரிவாயு போன்றவை மக்களுக்கு முழுமை​யாகச் சென்றடைவதில் மத்திய - மாநில அரசுகள் எவ்வாறு செயல்​படு​கின்றன என்பதைப் பொறுத்து நாட்டின் வறுமை விகிதம் கணக்கிடப்​படு​கிறது.

அந்த வகையில் 2023இல், இந்தியாவின் மாநிலங்கள், மத்திய ஆட்சிப் பகுதிகள், பல்பரிமாண வறுமைக் குறியீடு (Multidimensional Poverty Index - ஒரு குடும்பம், தனிநபரின் வருமானத்தை அடிப்​படை​யாகக் கொண்டு கணக்கிடப்​படுவது) மதிப்​பீட்​டின்படி, உத்தரப் பிரதேசம், பிஹார், மத்தியப் பிரதேசம், ஒடிஷா, ராஜஸ்தான் போன்ற மாநிலங்​களில் வறுமை விகிதம் குறிப்​பிடத்தக்க அளவில் குறைந்​துள்ளது. பிற மாநிலங்​களுடன் ஒப்பிடு​கையில் கோவா, கேரளம், தமிழ்​நாட்டில் வறுமை விகிதம் குறைவாக உள்ளது.

கிராமங்கள், நகரங்கள்: இந்தியக் கிராமங்​களில் வறுமை விகிதம் 2023இல் 7.2%இலிருந்து 2024இல் 4.8%ஆகக் குறைந்​துள்ளது. நகர்ப்பு​றங்​களில் இந்த எண்ணிக்கை 2023இல் 4.6%இலிருந்து 2024இல் 4.09%ஆகக் குறைந்​திருக்​கிறது. 2012 உடன் ஒப்பிடு​கையில் கிராமம், நகரங்​களில் வறுமை நிலை குறைந்​துள்ள​தாகவும் வரும் ஆண்டு​களில் இந்த எண்ணிக்கை மேலும் குறையும் எனவும் பாரத் ஸ்டேட் வங்கி சுட்டிக்​காட்​டி​யுள்ளது.

2023-24ஆம் ஆண்டில் கிராமப்புற - நகர்ப்புற நுகர்வு கணிசமாக அதிகரித்​துள்ளது. 2024ஆம் நிதியாண்​டில், நுகர்வு விகிதம் நகரத்தில் 8 சதவீதமும், கிராமத்தில் 9 சதவீதமும் அதிகரித்​துள்ளதாக மாதாந்திர வீட்டு நுகர்வு சார்ந்த தரவுகள் தெரிவிக்​கின்றன.

பாரத் ஸ்டேட் வங்கி ஆய்வில், 2023-24ஆம் ஆண்டில் மாதாந்திர தனிநபர் நுகர்வுச் செலவு (MPCE - monthly per capita consumption expenditure) கிராமப்பு​றங்​களுக்கு ரூ.4,122 ஆகவும், நகர்ப்பு​றங்​களுக்கு ரூ.6,996 ஆகவும் உள்ளது. அதே நேரத்தில் தினசரிச் செலவு கிராமம், நகரங்​களில் முறையே ரூ.137, ரூ.233 ஆக உள்ளது.

தமிழகத்​தில்... வறுமை விகிதம் குறைந்​து​வரு​வ​தில், இந்தியாவின் பிற மாநிலங்​களுடன் ஒப்பிடு​கையில் தமிழ்நாடு மிகவும் மேம்பட்ட நிலையில் உள்ளது. நிதி ஆயோக் வெளியிட்​டுள்ள 2023-24ஆம் நிதி ஆண்டுக்கான ‘நிலையான வளர்ச்சி இலக்குகள்’ குறியீட்​டின்படி, உயர்நிலைப் பள்ளி மாணவர் சேர்க்கை தேசிய சராசரி 57.6% ஆக உள்ள நிலையில், தமிழ்​நாட்டில் அது 81.5% ஆக உள்ளது.

அதேபோல், கல்லூரிச் சேர்க்கையில் தேசிய சராசரி 28.4% ஆக உள்ள நிலையில், தமிழ்​நாட்டில் அது 47% ஆக உள்ளது. தமிழ்​நாட்டின் கிராமப்பு​றங்​களில் 81.87% குடும்​பங்கள் சுத்தமான குடிநீர் வசதியைப் பெற்றுள்ளன. 92.8% குடும்​பங்​களில் ஒருவரிட​மாவது அலைபேசி உள்ளது. தமிழகத்தில் வேலையின்மை விகிதம் 4.3% ஆக இருக்​கிறது.

ஆய்வுகள் என்ன கூறுகின்றன? - சமூகவிய​லா​ள​ரும், மேரிலாந்து பல்கலைக்​கழகத்தின் பேராசிரியருமான சோனால்டே தேசாய் தலைமை​யில், காலேஜ் பார்க் - தேசியப் பயன்பாட்டுப் பொருளாதார ஆராய்ச்சி கவுன்சில் (NCAER) சமீபத்தில் ஓர் ஆய்வை நடத்தியது. மக்களுக்கும் வறுமைக்கும் இடையேயான இடைவெளி ஒரே நேர்க்​கோட்டில் பயணித்து​வருவதாக இந்த ஆய்வு முடிவு கூறுகிறது.

கடந்த 20 ஆண்டுகளாக இந்தியப் பொருளா​தாரம் வளர்ந்​துள்ளது. ஆனால், நீண்டகால வறுமையில் தவிக்கும் மக்கள் வறுமையில்​இருந்து நிரந்​தரமாக விடுபடு​வதற்கு மாறாக இயற்கைப் பேரழிவு, நோய்த் தாக்கம், நிலையற்ற பொருளாதார நிலை ஆகியவற்றைப் பொறுத்தே வறுமையி​லிருந்து வெளியேறுகிறார்கள்.

2011-12, 2022-24இல் நடத்தப்பட்ட ‘இந்திய மனித மேம்பாட்டுக் கணக்கெடுப்பு’த் தரவுகளின்​மூலம், சுமார் 18.1% மக்கள் வறுமையி​லிருந்து மீண்டுள்​ளனர்; எனினும் 5.3% பேர் புதிதாக வறுமை நிலைக்குத் தள்ளப்​பட்​டுள்ள​தாகத் தெரிய​வந்​துள்ளது.

பொருளா​தா​ரரீ​தியாக நாடு முன்னேற்றம் அடைந்​தா​லும், மக்கள் ஏதோ ஒருவகையில் வறுமை நிலைக்குத் தள்ளப்​படு​கின்றனர் என்பதை இத்தர​வுகள் உணர்த்தி​யுள்ளன. மேலும், நாள்பட்ட வறுமை நிலையைவிட, வருமானம் - செலவு சார்ந்து ஏற்படும் வறுமையே மக்களிடம் ஆதிக்கம் செலுத்து​வ​தாகப் பொருளாதார ஆய்வுகள் குறிப்​பிடு​கின்றன.

நீண்ட பயணம்: நவம்பர், 2024 வரையில் இந்தியாவின் பணவீக்க விகிதம் 5.48% ஆக இருந்தது. தொடர்ந்து நீடிக்கும் பணவீக்​கத்​தினால் மக்களின் அன்றாடச் செலவும் அதிகரித்​துள்ளது. 2021 - 2022ஆம் நிதியாண்டில் 19 கோடித் தொழிலா​ளர்கள் ஒரு நாளைக்கு 100 ரூபாய் மட்டுமே சம்பள​மாகப் பெற்ற நிலையில், வறுமைக்​கோட்டின் கீழ்தான் இத்தொழிலா​ளர்கள் வருகிறார்கள்.

2012 முதல் நுகர்வு - செலவினங்கள் குறித்த கணக்கெடுப்பை மத்திய அரசு வழங்காத நிலையில், வறுமை விகிதம் குறைந்​துள்ள​தாகக் கூறுவதை எப்படி ஏற்றுக்​கொள்ள முடியும் எனச் சமூக ஆர்வலர்கள் கேள்வி எழுப்​பி​யுள்​ளனர்.

வறுமையை ஒழிக்க மகாத்மா காந்தி தேசிய ஊரக வேலைவாய்ப்பு உறுதித் திட்டம், திறன் இந்தியா, கரீப் கல்யாண் அன்ன யோஜனா, தேசிய சமூகப் பாதுகாப்புத் திட்டம், தெருவோர வியாபாரி​களுக்கான பிரதம மந்திரியின் திட்டம் போன்றவை மத்திய அரசால் உருவாக்​கப்​பட்​டுள்ளன.

எனினும் இத்திட்​டங்கள் முறையாகச் செயல்​படுத்​தப்​படு​வதில் சில இடர்ப்​பாடுகள் நீடிக்​கின்றன. அந்த வகையில், வறுமையை நீக்கு​வதில் இந்தியா இன்னமும் நீண்ட தூரம் பயணிக்க வேண்​டி​யுள்ளது.