எச்1பி விசா கட்டண உயர்வால் திருமணத்தை ரத்து செய்துவிட்டு அமெரிக்காவுக்கு அவசரமாக புறப்பட்ட இந்தியர்கள்

புதுடெல்லி: எச்​1பி விசா கட்டண உயர்வு விவ​காரத்​தால் இந்​திய இளைஞர்​கள் திரு​மணத்தை ரத்து செய்​து​ விட்டு அமெரிக்கா​வுக்கு புறப்​பட்டு சென்​றுள்​ளனர்.

அமெரிக்​கா​வில் தற்​காலிக​மாக பணி​யாற்​று​வோருக்கு எச்​1பி விசா வழங்​கப்​படு​கிறது. ரூ.1.32 லட்​ச​மாக இருந்த இந்த விசா கட்​ட​ணத்தை அமெரிக்க அரசு திடீரென ரூ.88 லட்​ச​மாக உயர்த்​தி​யது. புதிய கட்டண முறை நேற்று முதல் அமலுக்கு வந்​துள்​ளது. அமெரிக்​கா​வில் எச்​1பி விசா​வில் சுமார் 7.50 லட்​சம் பேர் பணி​யாற்றி வரு​கின்​றனர். அவர்​களின் மனை​வி, பிள்​ளை​கள் என சுமார் 6 லட்​சம் பேரும் அமெரிக்​கா​வில் வசிக்​கின்​றனர். இதில் 75 சதவீதம் பேர் இந்​தி​யர்​கள் ஆவர்.

எச்1 பி விசா கட்டண விதி​கள் குறித்து முதல் நாளில் தெளி​வான விளக்​கம் அளிக்​கப்​பட​வில்​லை. இதன்​காரண​மாக அமெரிக்​கா​வின் மெட்​டா, மைக்​ரோ​சாப்ட் உள்​ளிட்ட நிறு​வனங்​கள், வெளி​நாட்டு ஊழியர்​கள் அமெரிக்கா​வுக்கு திரும்ப அறி​வுறுத்​தி​யது.

அமெரிக்​கா​வில் எச்​1பி விசா​வில் பணி​யாற்​றும் இந்​திய மென்​பொறி​யாளர்​கள் பலரும் நவராத்​திரியை முன்​னிட்டு சொந்த ஊர்​களுக்கு வந்​துள்​ளனர். இதே​போல திரு​மணத்​துக்​காக​வும் பலர் இந்​தி​யா​வுக்கு வந்​துள்​ளனர். எச்​1பி விசா கட்டண உயர்வு விவ​காரத்​தால் இந்​திய மென்​பொறி​யாளர்​கள் உடனடி​யாக அமெரிக்கா​வுக்கு புறப்​பட்டு உள்​ளனர்.

பெயர் வெளி​யிட விரும்​பாத இந்​திய மென்​பொறி​யாளர் ஒரு​வர் கூறும்​போது, “நான் பணி​யாற்​றும் நிறு​வனத்​தில் இருந்து உடனடி​யாக அமெரிக்கா​வுக்கு திரும்ப இ-மெ​யில் அனுப்​பப்​பட்டு உள்​ளது. இதன்​காரண​மாக திரு​மணத்தை ரத்து செய்​து​விட்டு அமெரிக்கா​வுக்கு புறப்​பட்டு செல்​கிறேன்’’ என்று தெரி​வித்​தார். இதே​போல ஏராள​மான இந்​திய இளைஞர்​கள் மற்​றும் இளம்​பெண்​கள் திரு​மணத்தை ரத்து செய்​து​விட்டு அமெரிக்கா​வுக்கு புறப்​பட்டு சென்​றுள்​ளனர்.

அமெரிக்​கா​வில் பணி​யாற்​றும் இந்​திய பொறி​யாளர் ஒரு​வர் கூறும்​போது, “தீ​பாவளிக்​காக இந்​தியா திரும்ப திட்​ட​மிட்டு இருந்​தேன். இப்​போதைய நிலை​யில் அமெரிக்​காவை விட்டு வெளி​யேற வேண்​டாம் என்று நிறுவன அதி​காரி​கள் அறி​வுறுத்தி உள்​ளனர். இதனால் தீபாவளி பயணத்தை ரத்து செய்​துள்​ளேன்’’ என்று தெரி​வித்​தார்.

அமெரிக்​கா​வில் பணி​யாற்​றும் இந்​திய மென்​பொறி​யாளர் ஒரு​வர் சமூக வலை​தளத்​தில் வெளி​யிட்ட பதி​வில் கூறி​யிருப்​ப​தாவது: அமெரிக்க அரசின் நடவடிக்கை அநீ​தி​யானது. ஒரு வாரம்​கூட எனது தாயோடு தங்க முடிய​வில்​லை. அமெரிக்க அரசை பொறுத்​தவரை எச்​1பி என்​பது வெறும் விசா மட்​டுமே. அந்த வி​சா​வின் பின்​னால் மனிதர்​கள் உள்​ளனர். அவர்​களின் வாழ்க்கை அடங்​கி​யிருக்​கிறது. அனைத்​தை​யும் இழந்து அமெரிக்கா​வுக்​கு புறப்​படு​கிறோம்​. இவ்​வாறு அவர்​ தெரிவித்​துள்​ளார்​.