“பாகிஸ்தானை முழுமையாக தாக்கும் திறனை இந்தியா கொண்டுள்ளது” - ராணுவம் சொல்வது என்ன?

புது டெல்லி: பாகிஸ்தானை அதன் முழு ஆழத்திலும் சென்று இலக்குகளைத் தாக்கும் அளவுக்கான ஆயுதத் திறனை இந்தியா கொண்டுள்ளது என்று ராணுவ விமானப் பாதுகாப்பு படையின் லெப்டினன்ட் ஜெனரல் சுமர் இவான் டி’குன்ஹா தெரிவித்தார்.

இது குறித்து செய்தி நிறுவனம் ஒன்றுக்கு லெப்டினன்ட் ஜெனரல் டி'குன்ஹா அளித்துள்ள நேர்காணலில், “முழு பாகிஸ்தானும் இந்திய ஆயுதங்களின் எல்லைக்குள் உள்ளது. பாகிஸ்தான் ராணுவத்தின் பொதுத் தலைமையகத்தை ராவல்பிண்டியில் இருந்து கைபர் பக்துன்க்வா போன்ற பகுதிகளுக்கு மாற்றினாலும், அவர்கள் ஓர் ஆழமான பதுங்குகுழியைக் கண்டுபிடிக்க வேண்டும்” என்று கூறினார்.

மேலும், "பாகிஸ்தானை அதன் முழுமையான ஆழத்தில் சென்று தாக்குவதற்கு போதுமான ஆயுதக் களஞ்சியத்தை இந்தியா கொண்டுள்ளது என்று நான் கூற விரும்புகிறேன். எனவே, அதன் அகலம் முதல் குறுகலான இடம் வரை, அது எங்கிருந்தாலும், முழு பாகிஸ்தானும் இந்திய ஆயுதங்களின் எல்லைக்குள் உள்ளது. எங்கள் எல்லைகளில் இருந்தோ அல்லது ஆழமாகவோ கூட, முழு பாகிஸ்தானையும் எதிர்கொள்ள நாங்கள் முற்றிலும் திறமையானவர்கள். மேலும், ராவல்பிண்டியில் இருந்து கைபர் பக்துன்க்வா அல்லது அவர்கள் எங்கு செல்ல விரும்பினாலும் செல்ல முடியும், ஆனால் அவை அனைத்தும் எங்கள் வரம்புக்குள் உள்ளன” என்றார்

தொடர்ந்து பேசிய அவர், "நமது இறையாண்மையை, நமது மக்களைப் பாதுகாப்பதே நமது வேலை. எனவே, மக்கள் கூடும் இடங்களிலும், நமது கன்டோன்மென்ட்களிலும் ஏராளமான பிரச்சினைகளை ஏற்படுத்தும் நோக்கில் நடத்தப்பட்ட இந்தத் தாக்குதலில் இருந்து நமது தாய்நாட்டைப் பாதுகாக்க முடிந்தது என்பதே, நமது மக்களுக்கு மட்டுமல்ல, நமது சொந்த ஜவான்கள், அதிகாரிகள், மனைவிகள் என பலருக்கும் அளித்த உறுதிமொழி. இறுதியாக, இந்திய மக்கள் பெருமைப்படுகிறார்கள். அதுதான் வெற்றி என்று நான் நினைக்கிறேன்" என்று கூறினார்