உலகின் மிகப்பெரிய கலைஞர்களை ஈர்க்கும் இந்தியா: ‘கோல்ட்ப்ளே’ கச்சேரி குறித்து பிரதமர் மோடி கருத்து

மும்பை மற்றும் அகமதாபாத்தில் உலக புகழ்பெற்ற கோல்ட்ப்ளே இசைச் கச்சேரி வெற்றிகரமாக நடந்து முடிந்துள்ள நிலையில், உலகின் மிகப்பெரிய கலைஞர்கள் எல்லாம் தற்போது இந்தியா நோக்கி ஈர்க்கப்படுகிறார்கள் என்று பிரதமர் நரேந்திர மோடி பெருமிதம் தெரிவித்துள்ளார்.

இதுகுறித்து பிரதமர் மோடி, மேக் இன் ஒடிசா 2025 மாநாட்டில் கூறியதாவது: மும்பை மற்றும் அகமதாபாத்தில் ஏற்பாடு செய்யப்பட்ட கோல்ட்ப்ளே இசைக் கச்சேரியின் அற்புதமான படங்களை நீங்கள் நிச்சயம் பார்த்திருக்க வேண்டும். இது, இந்தியாவில் நேரடி கச்சேரிகளுக்கு (லைவ் கான்சர்ட்) மிகப்பெரிய வாய்ப்பு உள்ளதை எடுத்துக்காட்டுகிறது. உலகெங்கிலும் இருந்து மிகப்பெரிய கலைஞர்கள் இந்தியா நோக்கி வரத்தொடங்கியுள்ளனர். இதுபோன்ற கச்சேரிகளை நடத்தும் வகையில், இதர மாநிலங்கள் மற்றும் தனியார் துறையும் உள்கட்டமைப்பு மற்றும் திறனை உருவாக்குவதில் கவனம் செலுத்தும் என்று நான் எதிர்பார்க்கிறேன்.

இந்தியாவின் பொருளாதார விரிவாக்கம் இரண்டு முக்கிய கூறுகளை கொண்டுள்ளது. ஒன்று, நமது புதுமையான சேவைத் துறை. இரண்டாவது இந்தியாவின் தரமான தயாரிப்புகள். மூலப் பொருட்களை ஏற்றுமதி செய்வதால் மட்டுமே நாம் விரைவான வளர்ச்சியை எட்டுவது சாத்தியமில்லை.

நாங்கள் முழுமையாக தொழிற்சூழல் அமைப்பை மாற்றி அமைக்கிறோம். மோடியால் ஏற்றுக்கொள்ள முடியாத போக்கை இந்தியா முற்றிலும் மாற்றியமைத்து வருகிறது. இவ்வாறு பிரதமர் மோடி கூறினார்.

பாஜக ஆளும் இரண்டு மாநிலங்களில் பிரிட்டிஷ் இசைக் குழுவினரின் இசை நிகழ்ச்சி நடைபெற்றது. இதில், ஜெய் ஸ்ரீராம் என்று கூறி இங்கிலாந்தின் காலனித்துவ வரலாற்றுக்கு மன்னிப்புக் கேட்டு, கிரிக்கெட் வீரர் ஜஸ்பிரீத் பும்ராவுக்கு ஒரு பாடலை அர்ப்பணிப்பதாக கூறி இசை குழுவினர் கச்சேரியை தொடங்கினர்.