“மோடி தலைமையில் இந்தியா கண்டுள்ளது இணையற்ற வளர்ச்சி!” - ஜக்தீப் தன்கர் பெருமிதம்

புதுடெல்லி: பிரதமர் நரேந்திர மோடியின் தலைமையின் கீழ் இந்தியா பெற்றுள்ள வளர்ச்சி இணையற்றது என்றும், இதனால் மக்களின் விருப்பங்கள் அதிகரித்துள்ளன என்றும் குடியரசு துணைத் தலைவர் ஜக்தீப் தன்கர் தெரிவித்துள்ளார்.

பிஹார் முன்னாள் முதல்வரும் பாரத ரத்னா விருது பெற்றவருமான கர்பூரி தாக்கூரின் 101வது பிறந்தநாளை முன்னிட்டு பிஹாரின் சமஸ்திபூர் மாவட்டத்தில் நடைபெற்ற நிகழ்ச்சியில் பேசிய ஜக்தீப் தன்கர், "கடந்த 10 ஆண்டுகளில் நாடு கண்ட வளர்ச்சி ஈடு இணையற்றது. நாம் ஏற்கனவே ஐந்தாவது பெரிய பொருளாதாரமாக இருக்கிறோம். இன்னும் ஐந்து ஆண்டுகளில், மூன்றாவது இடத்தைப் பிடிப்போம். வளர்ச்சி அடைந்த இந்தியா ஒரு கனவு அல்ல. சுதந்திரத்தின் நூற்றாண்டு விழாவை நாம் கொண்டாடும் 2047 ஆம் ஆண்டுக்குள் அது நனவாகும். பாரதம் விஸ்வ குருவாக மாறும்.

எரிவாயு இணைப்புகள், மின்சாரம் மற்றும் கழிப்பறைகளை வழங்குவதன் மூலம் சாதாரண மக்களின் வாழ்க்கைத் தரத்தை மேம்படுத்தும் திட்டங்களை ஆர்வத்துடன் கொண்டு வந்ததற்காக பிரதமர் மோடியை பாராட்டுகிறேன். மக்கள் இப்போது வளர்ச்சியை ருசித்துள்ளனர். அவர்களின் விருப்பங்கள் வானத்தை எட்டுகின்றன.

இந்த தருணத்தில் இளைஞர்களுக்கு ஒன்று சொல்ல விரும்புகிறேன். அரசாங்க வேலைகளைப் பற்றி சிந்திப்பதன் மூலம் உங்களை நீங்களே கட்டுப்படுத்திக் கொள்ளாதீர்கள். இன்றைய அரசாங்கத்தின் கொள்கைகள் உங்கள் வரம்பற்ற திறனைப் பயன்படுத்துவதை நோக்கமாகக் கொண்டுள்ளன. வாய்ப்புகளை முழுமையாகப் பயன்படுத்திக் கொள்ளுங்கள்.

கர்பூரி தாக்கூர் மற்றும் சவுத்ரி சரண் சிங் ஆகியோருக்கு பாரத ரத்னா அறிவிக்கப்பட்டபோது மாநிலங்களவையில் ஏற்பட்ட உற்சாகம் எனக்கு நினைவில் இருக்கிறது. என் மனதில் ஒரு எண்ணம் எழுந்தது - கர்பூரி தாக்கூர் இறந்து 36 ஆண்டுகளுக்குப் பிறகு அந்த மரியாதை அவருக்கு கிடைத்தது. அது ஏன் முன்பே நடக்கவில்லை? இப்போது நிச்சயமாக ஒரு மாற்றம் ஏற்பட்டுள்ளது.

கர்பூரி தாக்கூர் சமூக நீதியின் தூதுவர். அவர் எப்போதும் சமத்துவம், சகோதரத்துவம் மற்றும் அனைவருக்கும் நீதி ஆகியவற்றில் நம்பிக்கை கொண்டிருந்தார். ஏழைகள் மற்றும் ஒடுக்கப்பட்டவர்களுக்கு உதவ அவர் தனது செல்வாக்கைப் பயன்படுத்தினார். கர்பூரி தாக்கூர் ஒரு உண்மையான அரசியல்வாதி. விதிவிலக்கானவர். நாட்டில் சமூக நீதி என்ற கருத்தை வளர்த்த பெருமை அவருக்கு உண்டு. சமூக ரீதியாக ஒதுக்கப்பட்ட மற்றும் நலிவடைந்தவர்களுக்கு இடஒதுக்கீடு வழங்குவதற்கான களத்தை அமைப்பதில் தாக்கூரின் முயற்சிகள் மிக முக்கியமானவை" என்று தெரிவித்தார்.

ஆளுநர் ஆரிஃப் முகமது கான், மத்திய அமைச்சர்கள் சிவராஜ் சிங் சவுகான், நித்யானந்த் ராய், கர்பூரி தாக்கூரின் மகன் ராம்நாத் தாக்கூர் உள்ளிட்ட ஏராளமானோர் நிகழ்ச்சியில் கலந்து கொண்டனர். எனினும், கர்பூரி தாக்கூரின் தீவிர சீடரான முதல்வர் நிதிஷ் குமார் விழாவில் கலந்து கொள்ளவில்லை என்பது குறிப்பிடத்தக்கது.