ரயில்வே துறை வரலாற்றில் மிகவும் மோசமான விபத்துகள்

புதுடெல்லி: ஒடிசா விபத்து, ரயில்வே துறை வரலாற்றில சுதந்திரத்துக்குப் பிறகு நிகழ்ந்த மிகவும் மோசமான விபத்துகளில் ஒன்று என புள்ளிவிவரம் கூறுகிறது.

ஒடிசாவின் பாலசோர் மாவட்டத்தில் அடுத்தடுத்து மூன்று ரயில்கள் விபத்துக்குள்ளான சம்பவத்தில் 280-க்கும் மேற்பட்டோர் உயிரிழந்தனர். சுமார் ஆயிரம் பேர் காயம் அடைந்துள்ளனர். இது ரயில்வே துறை வரலாற்றில சுதந்திரத்துக்குப் பிறகு நிகழ்ந்த மிகவும் மோசமான விபத்துகளில் ஒன்று என புள்ளிவிவரம் கூறுகிறது. இதற்கு முன்பு நிகழ்ந்த மோசமான விபத்துகள்:

1964 டிசம்பர் 23: ராமேஸ்வரம் புயல் காரணமாக பாம்பன்-தனுஷ்கோடி பயணிகள் ரயில் விபத்தில் சிக்கியதில் 126 பேர் உயிரிழந்தனர்.

1981 ஜூன் 6: பிஹார் மாநிலம் பாக்மதி ஆற்றின் குறுக்கே கட்டப்பட்டுள்ள பாலத்தை கடக்கும்போது நிகழ்ந்த ரயில் விபத்தில் 750-க்கும் மேற்பட்டோர் உயிரிழந்தனர்.

1995 ஆகஸ்ட் 20: உத்தரபிரதேச மாநிலம் பிரோசாபாத் அருகே நின்று கொண்டிருந்த களிந்தி எக்ஸ்பிரஸ் ரயில் மீது புருஷோத்தம் எக்ஸ்பிரஸ் ரயில் மோதியதில் 305 பேர் உயிரிழந்தனர்.

1998 நவம்பர் 26: பஞ்சாபின் கன்னா பகுதியில் பிரன்டீர் கோல்டன்டெம்பிள் மெயிலின் தடம்புரண்ட 3 பெட்டிகள் மீது ஜம்மு டாவி-சீல்டா எக்ஸ்பிரஸ் ரயில் மோதியதில் 212 பேர் உயிரிழந்தனர்.

1999 ஆகஸ்ட் 2: மேற்கு வங்கமாநிலம் கைசால் ரயில் நிலையத்தில் நின்று கொண்டிருந்த அவாத் அசாம் எக்ஸ்பிரஸ் ரயில் மீது பிரம்மபுத்ரா மெயில் மோதிய விபத்தில் ராணுவம், துணை ராணவ வீரர்கள் உட்பட 285 பேர் உயிரிழந்தனர்.

2002 செப்டம்பர் 9: பிஹார் மாநிலம் ரபிகஞ்ச் நகருக்கு அருகே தாவே ஆற்றின் குறுக்கே கட்டப்பட்டுள்ள பாலத்தின் மீது சென்ற ஹவுரா-ராஜ்தானி எக்ஸ்பிரஸ் ரயில் தடம்புரண்டதில் 140-க்கும் மேற்பட்டோர் உயிரிழந்தனர்.

2010 மே 28: மேற்கு வங்க மாநிலம் ஜார்க்ரம் அருகே தடம்புரண்ட ஞானேஸ்வரி எக்ஸ்பிரஸ் ரயில் மீது சரக்கு ரயில் மோதியதில் 148 பயணிகள் உயிரிழந்தனர்.

2016 நவம்பர் 20: உத்தர பிரதேச மாநிலம் புக்ராயன் நகரில் இந்தூர்-ராஜேந்திர நகர் எக்ஸ்பிரஸ் ரயிலின்14 பெட்டிகள் தடம் புரண்டதில் 152 பேர் உயிரிழந்தனர்.