எட்டயபுரம்: கொலை வழக்கில் கைதானவர் தப்பி ஓட முயற்சி; துப்பாக்கியால் சுட்டுப் பிடித்த போலீஸ்

கோவில்பட்டி: எட்டயபுரம் அருகே மேலநம்பிபுரத்தில் தாய், மகள் கொலை செய்யப்பட்ட சம்பவத்தில் கைது செய்யப்பட்ட முனீஸ்வரன் போலீஸாரை தாக்கி விட்டு தப்பி ஓடும்போது துப்பாக்கியால் சுடப்பட்டார். இதில் உதவி ஆய்வாளர் உட்பட 2 போலீஸார் காயமடைந்தனர்.

எட்டயபுரம் அருகே மேல நம்பிபுரம் கிழக்கு தெருவைச் சேர்ந்த ஓய்வு பெற்ற ஆசிரியர் பூவன். இவரது மனைவி சீதாலட்சுமி (75). பூவன் கடந்த சில ஆண்டுகளுக்கு முன்பு இறந்துவிட்டார். இவர்களது மகள் ராம ஜெயந்தி (45). கருத்து வேறுபாடு காரணமாக கணவரை விட்டு பிரிந்த ராமஜெயந்தி தனது தாய் சீதா லட்சுமியுடன் கடந்த சில ஆண்டுகளாக வசித்து வந்தார். கடந்த 2-ம் தேதி தேவலாயத்துக்கு சென்று விட்டு இருவரும் வீடு திரும்பி உள்ளனர். இந்நிலையில் சீதாலட்சுமியும் அவரது மகள் ராமஜெயந்தியும் வீட்டுக்குள் சடலமாக கிடப்பதாக அக்கம்பக்கத்தினர் 3-ம் தேதி எட்டயபுரம் காவல் நிலையத்துக்கு தகவல் தெரிவித்தனர்.

விளாத்திகுளம் டிஎஸ்பி அசோகன், எட்டயபுரம் காவல் ஆய்வாளர் சுந்தரமூர்த்தி மற்றும் போலீஸார் சம்பவ இடத்துக்கு விரைந்து சென்று பார்வையிட்டு சீதாலட்சுமி மற்றும் ராம ஜெயந்தி சடலத்தை கைப்பற்றி பிரேத பரிசோதனைக்காக தூத்துக்குடி அரசு மருத்துவமனைக்கு அனுப்பி வைத்தனர். முதற்கட்ட விசாரணையில் வீட்டுக்குள் சடலமாக கிடந்த சீதாலட்சுமி, அவரது மகள் ராம ஜெயந்தி ஆகியோர் அணிந்திருந்த கம்மல்கள், 13 சவரன் தங்க நகைகள் திருடப்பட்டிருப்பதும், இவர்கள் மேலநம்பிபுரம் கிராமத்தில் யாரிடமும் நெருங்கிய தொடர்பில் இல்லாததும் தெரிய வந்தது.

தொடர்ந்து, மோப்ப நாய்கள் திமோ, ஹரீஸ், விரல் ரேகை பிரிவு அதிகாரிகள் மற்றும் தடயவியல் நிபுணர்கள் வரவழைக்கப்பட்டு தடயங்களை சேகரித்தனர். மேல நம்பிபுரத்தில் இருந்து கோட்டூர் செல்லும் கிராமச் சாலையில் சீதாலட்சுமியின் செல்போன் கண்டெடுக்கப்பட்டது. திருநெல்வெலி சரக டிஐஜி (பொறுப்பு) சந்தோஷ் ஹதி மணி, மாவட்ட காவல் கண்காணிப்பாளர் ஆல்பர்ட் ஜான் ஆகியோர் சம்பவ இடத்தை நேரில் பார்வையிட்டனர். தொடர்ந்து கடந்த 3 நாட்களாக எட்டயபுரத்தில் முகாமிட்டும் விசாரணை நடத்தினர்.

இச்சம்பவம் தொடர்பாக எட்டயபுரம் போலீஸார் வழக்குப் பதிந்து 9 தனிப்படைகள் அமைத்து குற்றவாளிகளை தேடினர். மேலும், சந்தேகத்தின் பேரில் எட்டயபுரம் சுற்றுவட்டார பகுதிகளைச் சேர்ந்த 10-க்கும் மேற்பட்ட நபர்களை தனிப்படை போலீஸார் பிடித்து ரகசிய இடத்தில் வைத்து விசாரணை நடத்தினர். பிடிபட்ட 10 பேரில் மேல நம்பிபுரத்தைச் சேர்ந்த வேல்முருகன் (28), தாப்பாத்தியைச் சேர்ந்த முகேஷ் கண்ணன் (25) ஆகிய இருவருக்கு கொலைச் சம்பவத்தில் தொடர்பு இருப்பதும், கஞ்சா போதையில் தாய், மகளை கொலை செய்துவிட்டு, நகைகளை திருடியதும் தெரியவந்துள்ளது.

மேலும் இந்தச் சம்பவத்தில் முக்கிய நபரான மேல நம்பிபுரத்தைச் சேர்ந்த மகன் முனீஸ்வரன்(24) என்பவர் காட்டுப்பகுதியில் பதுங்கி இருப்பதாக கிடைத்த தகவலையடுத்து தென் மண்டல ஐஜி பிரேம் ஆனந்த் சின்ஹா தலைமையில் டிஐஜி (பொறுப்பு) சந்தோஷ் ஹதி மணி, எஸ்.பி. ஆல்பர்ட் ஜான் மற்றும் 5 டிஎஸ்பிக்கள் 20 காவல் ஆய்வாளர்கள் அடங்கிய 9 தனிப்படை போலீஸார் காட்டுப்பகுதியில் 6 ட்ரோன்களை பறக்கவிட்டு தீவிரமாக தேடினர்.

அயன் வடமலாபுரம், முத்தலாபுரம், தாப்பாத்தி, கீழக்கரந்தை, புதுப்பட்டி, ரெகுராமபுரம் உள்ளிட்ட 20-க்கும் மேற்பட்ட கிராமங்களிலும் வைப்பாறு படுகையோர காட்டுப் பகுதியிலும் போலீஸார் கண்காணிப்பு பணியில் ஈடுபட்டனர். இந்நிலையில் இரவு அயன் வடமலாபுரத்தில் உள்ள உறவினர் வீட்டுக்கு முனீஸ்வரன்(25) வந்துள்ளார். இதனை அறிந்த போலீஸார் அங்கு சென்று சுற்றிவளைத்து அவரை மடக்கிப் பிடித்தனர்.

தொடர்ந்து அவரிடம் நடத்திய விசாரணையில் எட்டயபுரம் அருகே உள்ள காட்டுப்பகுதியில் திருடிய நகைகளை பதுக்கி வைத்துள்ளதாக தெரிவித்தார். இதைத்தொடர்ந்து இன்று அதிகாலை 4 மணியளவில் முனீஸ்வரனை குளத்தூர் காவல் நிலைய உதவி ஆய்வாளர் முத்துராஜ் மற்றும் போலீஸார் அவர் கூறிய பகுதிக்கு அழைத்துச் சென்றனர். இதில் தூத்துக்குடி - மதுரை தேசிய நான்கு வழிச்சாலையில் எட்டயபுரம் அருகே உள்ள எடைமேடையையொட்டிய காட்டுப் பகுதிக்கு அவர் போலீஸாரைஅழைத்துச் சென்றுள்ளார்.

அப்போது அங்குள்ள பனைமரம் அருகே மறைத்து வைத்திருந்த அரிவாளை எடுத்து உதவி ஆய்வாளர் முத்துராஜா, காவலர் ஜாய்சன் நவதாஸ் ஆகியோரை தாக்கிவிட்டு தப்பியோட முயன்றார். இதையடுத்து அவரை தப்பி ஓட வேண்டாம் என போலீஸார் எச்சரித்தனர். ஆனால் அவர் தொடர்ந்து காட்டுப்பகுதிக்குள் தப்பியோட முயற்சித்ததால், அவரை நோக்கி போலீஸார் துப்பாக்கி சூடு நடத்தினர். இதில் முனீஸ்வரனுக்கு வலது காலில் காயம் ஏற்பட்டது.

இதையடுத்து அவரை மடக்கி பிடித்த போலீஸார் சிகிச்சைக்காக எட்டயபுரம் அரசு மருத்துவமனைக்கு கொண்டு வந்தனர். அங்கிருந்து மேல் சிகிச்சைக்காக தூத்துக்குடி அரசு மருத்துவமனைக்கு அனுப்பி வைக்கப்பட்டார். காயமடைந்த போலீஸாரும் தூத்துக்குடி அரசு மருத்துவமனையில் அனுமதிக்கப்பட்டனர். இன்று காலை தூத்துக்குடி அரசு மருத்துவமனைக்கு சென்ற மாவட்ட காவல் கண்காணிப்பாளர் ஆல்பர்ட் ஜான் காயமடைந்த போலீஸாரிடம் விசாரணை நடத்தினார்.

ஏற்கெனவே கோவில்பட்டி மேற்கு காவல் நிலையத்துக்கு உட்பட்ட பகுதியில் பெண்ணை பலாத்காரம் செய்த தேடப்பட்ட நபர் போலீஸாரை தாக்கி விட்டு தப்பி ஓடும்போது காலில் துப்பாக்கியால் சுடப்பட்டார். அதேபோல் மேல நம்பிபுரத்தில் நகைக்காக தாய், மகளை கொலை செய்த வழக்கில் கைது செய்யப்பட்ட நபர் போலீஸாரை தாக்கி விட்டு தப்பும் போது துப்பாக்கியால் சுடப்பட்டுள்ளார். தூத்துக்குடி மாவட்டத்தில் 2-வது முறை துப்பாக்கியால் சுடப்பட்ட சம்பவம் பரபரப்பை ஏற்படுத்தியுள்ளது.