எட்டயபுரம் அருகே நகைகளுக்காக தாய், மகள் கொலையா? - போலீஸார் விசாரணை

கோவில்பட்டி: எட்டயபுரம் அருகே நகைகளுக்காக தாய், மகள் கொலை செய்யப்பட்டது தொடர்பாக போலீஸார் விசாரணை நடத்தி வருகின்றனர்.

எட்டயபுரம் அருகே மேலநம்பியாபுரம் கிழக்கு தெருவைச் சேர்ந்த பூவன் மனைவி சீதாலட்சுமி (70). பூவன் கடந்த சில நாட்களுக்கு முன்பு இறந்துவிட்டார். இவர்களது மகள் ராமஜெயந்தி (48). இவரது கணவர் விஸ்வா. இவர்களுக்கு இடையே ஏற்பட்ட கருத்து வேறுபாடு காரணமாக கடந்த சில ஆண்டுகளாக கணவரை பிரிந்த ராமஜெயந்தி தனது தாயுடன் மேலநம்பியாபுரத்தில் வசித்து வந்தார்.

இந்நிலையில், சீதாலட்சுமியும் அவரது மகள் ராமஜெயந்தியும் வீட்டுக்குள் சடலமாக கிடப்பதாக அக்கம்பக்கத்தினர் இன்று (மார்ச் 3) மாலை எட்டயபுரம் காவல் நிலையத்து தகவல் தெரிவித்தனர். விளாத்திகுளம் டி.எஸ்.பி. அசோகன், எட்டயபுரம் காவல் ஆய்வாளர் சுந்தரமூர்த்தி மற்றும் போலீஸார் சம்பவ இடத்துக்கு விரைந்து சென்று சீதாலட்சுமி மற்றும் ராமஜெயந்தி சடலத்தை கைப்பற்றி பிரேத பரிசோதனைக்காக தூத்துக்குடி அரசு மருத்துவமனைக்கு அனுப்பி வைத்தனர்.

முதற்கட்ட விசாரணையில் வீட்டுக்குள் சடலமாக கிடந்த சீதாலட்சுமி, அவரது மகள் ராமஜெயந்தி ஆகியோர் அணிந்திருந்த கம்மல்கள், 13 சவரன் தங்க நகைகள் திருடப்பட்டிருப்பது தெரியவந்தது. இதையடுத்து, மோப்ப நாய் ஹரீஸ், கைரேகை பிரிவு அதிகாரிகள் மற்றும் தடயவியல் நிபுணர்கள் வரவழைக்கப்பட்டு தடயங்கள், கைரேகைகளை சேகரித்தனர். மேலநம்பியாபுரத்தில் இருந்து கோட்டூர் செல்லும் கிராமச் சாலையில் சீதாலட்சுமியின் மொபைல் போன் கண்டெடுக்கப்பட்டுள்ளதாக போலீஸ் வட்டார தகவல்கள் தெரிவிக்கின்றன.

தகவலறிந்து திருநெல்வேலி சரக டிஐஜி (பொறுப்பு) சந்தோஷ் ஹதி மணி, மாவட்ட காவல் கண்காணிப்பாளர் ஆல்பர்ட் ஜான் ஆகியோர் சம்பவ இடத்தை நேரில் பார்வையிட்டு விசாரணை நடத்தினர். இச்சம்பவம் தொடர்பாக எட்டயபுரம் காவல் நிலைய போலீஸார் வழக்கு பதிந்து நகைகளுக்கான கொலை செய்யப்பட்டார்களா? அல்லது வேறு காரணமா? என்ற கோணத்தில் விசாரணை நடத்தி வருகின்றனர். இதில் தொடர்புடைய மர்மநபர்களை பிடிக்க 4 தனிப்படைகள் அமைத்து எஸ்.பி. ஆல்பர்ட் ஜான் உத்தரவிட்டுள்ளார்.