குக்கூ ராஜூமுருகனின் அடுத்த படம் தொடங்கியது

'குக்கூ' இயக்குநர் ராஜூமுருகன் இயக்கும் அடுத்த படத்தின் படப்பிடிப்பு தர்மபுரியில் தொடங்கி நடைபெற்று வருகிறது.

தினேஷ், மாளவிகா உள்ளிட்ட பலர் நடிக்க ராஜூமுருகன் இயக்கத்தில் 2014ம் ஆண்டு வெளியான படம் 'குக்கூ'. சந்தோஷ் நாராயணன் இசையமைத்த இப்படத்துக்கு பி.கே.வர்மா ஒளிப்பதிவு செய்திருந்தார். தி நெக்ஸ்ட் பிக் பிலிம் மற்றும் ஃபாக்ஸ் ஸ்டார் நிறுவனம் இணைந்து இப்படத்தை தயாரித்தனர்.

'குக்கூ' படத்தின் பத்திரிகையாளர் சந்திப்பில், ராஜூமுருகன் எங்களது நிறுவனத்துக்கே அடுத்த படத்தையும் இயக்கவிருக்கிறார் என்று தெரிவித்தார்கள். ராஜூ முருகனும் தனது அடுத்த படத்துக்கான கதை விவாதத்தில் ஈடுபட்டு வந்தார்.

இந்நிலையில், தற்போது 'காஷ்மோரா' படத்தின் தயாரிப்பு நிறுவனமான ட்ரீம் வாரியர் நிறுவனம் தயாரிக்கும் படத்தை இயக்கி வருகிறார் ராஜூமுருகன். ஆயுத பூஜை தினத்தில் இருந்து இப்படத்தின் படப்பிடிப்பு தர்மபுரியில் நடைபெற்று வருகிறது. முற்றிலும் புதுமுகங்கள் நடித்து வருகிறார்கள். ஒரே கட்டமாக முழு படப்பிடிப்பையும் முடிக்க திட்டமிட்டு இருக்கிறார்கள்.

இப்படத்தைத் தொடர்ந்து 'குக்கூ' தயாரிப்பாளர்கள் தயாரிக்கும் படத்தை இயக்க திட்டமிட்டு இருக்கிறார் ராஜூமுருகன்.