தற்கொலையை தடுக்கும் பேஸ்புக் ‘மெஸன்ஜர்’!

ஸ்ரீராம் கார்த்திக் ஹீரோவாக நடித்துள்ள படம், ‘மெஸன்ஜர்’. மனீஷா ஜஸ்னானி, ஃபாத்திமா நஹீம், வைசாலி ரவிச்சந்திரன், லிவிங்ஸ்டன், பிரியதர்ஷினி ராஜ்குமார், ஜீவா ரவி உள்ளிட்டோர் நடித்துள்ளனர். பி.வி.கே ஃபிலிம் ஃபேக்டரி சார்பில் பா.விஜயன் தயாரித்துள்ள இந்தப் படத்தின் கதை, திரைக்கதை எழுதி இயக்கி இருக்கிறார் ரமேஷ் இலங்காமணி. பால கணேசன் ஒளிப்பதிவு செய்துள்ள இந்தப் படத்துக்கு அபு பக்கர் இசையமைத்துள்ளார்.

இதன் டிரெய்லர் வெளியாகி வரவேற்பைப் பெற்றுள்ள நிலையில் இயக்குநர் ரமேஷ் இலங்காமணி கூறும்போது, “ இது காதல் ஃபேன்டஸி படம். காதல் தோல்வி காரணமாக நாயகன் ஸ்ரீராம் கார்த்திக் தற்கொலைக்கு முயற்சிக்கிறார். அவரது முகநூல் மெஸன்ஜரில் ஒரு பெண் தகவல் அனுப்பி அதை தடுக்கிறார். தான் தற்கொலை செய்யப் போவது அவளுக்கு எப்படித் தெரியும்?

அந்தப் பெண் யார்? என்று தேடுகிறார் நாயகன். பிறகு என்ன நடக்கிறது என்பது கதை. காதல் கதை என்றாலும் இதுவரை பார்த்திராத ஒன்றாக இருக்கும். பேஸ்புக் மெஸன்ஜரால் வாழ்வில் ஏற்படும் மாற்றங்களைச் சுவாரஸ்யமாகச் சொல்லும் படமாக இது உருவாகி இருக்கிறது. சென்னை மற்றும் விக்கிரவாண்டி அருகிலுள்ள புதுப்பாளையம் பகுதிகளில் படப்பிடிப்பு நடந்துள்ளது. அக்டோபர் 31-ம் தேதி வெளியாகிறது” என்றார்.

கருத்தைப் பதிவு செய்ய

லேட்டஸ்ட் அப்டேட்களுக்கு இந்து தமிழ்திசை வாட்ஸ்அப் சேனலை Follow செய்யுங்கள்...
Follow