வேடன், அறிவு குரலில் வெளியான பைசன் காளமாடன் படத்தின் ‘றெக்க றெக்க’ பாடல்!

இயக்குநர் மாரி செல்வராஜ் இயக்கத்தில் உருவாகியுள்ள ‘பைசன் காளமாடன்’ படத்தின் இரண்டாவது பாடலான ‘றெக்க றெக்க’ பாடலை படக்குழு வெளியிட்டுள்ளது. இந்த பாடலை பாடகர்கள் வேடன் மற்றும் அறிவு இணைந்து பாடி உள்ளனர்.

‘மாமன்னன்’ படத்திற்குப் பிறகு மாரி செல்வராஜ் இயக்கும் படம் ‘பைசன் காளமாடன்’. இப்படத்தில் துருவ் விக்ரம், அனுபமா பரமேஸ்வரன், லால், பசுபதி, கலையரசன், ரஜிஷா விஜயன், ஹரி கிருஷ்ணன், அழகம் பெருமாள் உள்ளிட்ட பலர் நடித்துள்ளனர். தீபாவளி வெளியீடாக இந்தப் படம் வெளியாகிறது.

இந்த படத்தின் இசையமைப்பாளராக நிவாஸ் கே.பிரசன்னா, ஒளிப்பதிவாளராக எழில் அரசு ஆகியோர் பணிபுரிந்துள்ளனர். அப்ளாஸ் என்டர்டெயின்மென்ட் மற்றும் பா.ரஞ்சித்தின் நீலம் ஸ்டுடியோஸ் ஆகிய நிறுவனங்கள் இணைந்து தயாரித்துள்ளன. கடந்த 1-ம் தேதி இந்த படத்தின் முதல் பாடலான ‘தீக்கொளுத்தி’ பாடல் வெளியாகி இருந்தது. இந்த பாடல் சுமார் 8.3 மில்லியன் பார்வையை பெற்றுள்ளது.

இந்நிலையில், இந்த படத்தில் இடம்பெற்றுள்ள இரண்டாவது பாடலான ‘றெக்க றெக்க’ பாடல் படக்குழு வெளியிட்டுள்ளது. இந்த பாடல் அறிவு மற்றும் இயக்குநர் மாரி செல்வராஜ் இணைந்து எழுதி உள்ளனர். அதை ராப் இசை பாடகர்களான வேடன் மற்றும் அறிவு ஆகியோர் இணைந்து பாடி உள்ளனர்.

சுமார் 5.49 நிமிடங்கள் ரன் டைம் கொண்ட இந்த பாடலின் வரிகள் உத்வேகமும், நம்பிக்கையும் தரும் வகையில் எழுதப்பட்டுள்ளது. இந்த பாடலை கேட்டு ரசித்த பலரும் ‘வேடன் மற்றும் அறிவு’ இணைந்து பாடியது சரியான தேர்வு என கமெண்ட் செய்து வருகின்றனர். >>றெக்க றெக்க பாடலுக்கான லிங்க்