ஸ்பை யுனிவர்ஸ் படங்களில் வசூல் அதிர்ச்சி கொடுத்த ‘வார் 2’

ஸ்பை யுனிவர்ஸ் படங்களில் மிக குறைந்த அளவிலேயே ‘வார் 2’ திரைப்படம் வசூல் செய்து அதிர்ச்சியை ஏற்படுத்தி இருக்கிறது.

இந்தியாவின் முன்னணி தயாரிப்பு நிறுவனமான யஷ் ராஜ் பிலிம்ஸ் தொடர்ச்சியாக பல்வேறு ஸ்பை யுனிவர்ஸ் படங்களை தயாரித்து வருகிறது.

இதில் ‘டைகர்’, ‘பதான்’, ‘வார்’ உள்ளிட்ட பல படங்கள் அடங்கும். இதில் ஷாரூக்கான், சல்மான்கான், ஹ்ரித்திக் ரோஷன் உள்ளிட்டோர் நடித்திருந்தனர். இதன் தொடர்ச்சியாக வெளியான படம் ‘வார் 2’. இது பெரும் எதிர்பார்ப்புக்கு இடையே வெளியானது.

‘வார் 2’ படத்தின் ட்ரெய்லர், போஸ்டர்கள் எதுவுமே மக்களிடையே பெரிதாக ஈர்க்கவில்லை. இதனால் அனைத்து மாநிலங்களிலும் குறைந்த அளவிலேயே வசூல் செய்திருக்கிறது. குறிப்பாக ஸ்பை யுனிவர்ஸ் படங்களின் முதல் நாள் வசூலில் மிக குறைந்த வசூல் செய்த படம் என்ற பெயரை ‘வார் 2’ எடுத்துள்ளது. இப்படத்தின் மூலம் இந்தியில் அறிமுகமாகிறார் ஜூனியர் என்.டி.ஆர்.

ஜூனியர் என்.டி.ஆர் நடித்திருப்பதால் தெலுங்கில் மிகப்பெரிய அளவுக்கு வசூல் இருக்கும் என்று படக்குழு எதிர்பார்த்தது. அதுவும் பெரிதாக எடுபடவில்லை. மேலும், விமர்சன ரீதியாகவும் யாருமே ‘வார் 2’ படத்தினை பாராட்டவில்லை. இதனால் வரும் நாட்களில் ‘வார் 2’ படத்தின் வசூல் குறையும் என எதிர்பார்க்கப்படுகிறது.

அயன் முகர்ஜி இயக்கத்தில் ஹ்ரித்திக் ரோஷன், ஜூனியர் என்.டி.ஆர், கியாரா அத்வானி உள்ளிட்ட பலர் நடிப்பில் வெளியாகியுள்ள படம் ‘வார் 2’. யஷ் ராஜ் நிறுவனம் தயாரித்து வெளியிட்டுள்ளது.