ஆக.2-ல் ரஜினியின் ‘கூலி’ ட்ரெய்லரை வெளியிட திட்டம்!

ஆகஸ்ட் 2-ம் தேதி ’கூலி’ ட்ரெய்லர் வெளியாகும் என்று இயக்குநர் லோகேஷ் கனகராஜ் தெரிவித்துள்ளார்.

சன் பிக்சர்ஸ் தயாரிப்பில் உருவாகியுள்ள படம் ‘கூலி’. ஆகஸ்ட் 14-ம் தேதி வெளியாகவுள்ள இப்படத்தின் 2 பாடல்கள் மட்டுமே வெளியிடப்பட்டுள்ளது. டீசர், ட்ரெய்லர் உள்ளிட்டவை எப்போது என்ற எந்தவொரு தகவலுமே தெரியாமல் இருந்தது. இது தொடர்பாக லோகேஷ் கனகராஜ், “‘கூலி’ படத்துக்கு எதிர்பார்ப்பு ரொம்பவே அதிகமாக இருக்கிறது. எனக்கே தெரியாத விஷயங்களை எல்லாம் பேசிக் கொண்டிருக்கிறார்கள்.

நான் தினமும் எழுந்தவுடன் சமூக வலைதளத்தில் படத்தைப் பற்றி ஏதேனும் செய்திகள் இருக்கும். அது ரொம்பவே பிடித்திருக்கிறது. அவை அனைத்துமே படத்துக்கான விளம்பரம் தானே என்பதால் விட்டுவிடுவேன். இப்போதைக்கு இறுதிகட்டப் பணிகளை முடிக்க வேண்டும். பல்வேறு நாடுகளில் படம் வெளியாக இருப்பதால், அதற்கான தணிக்கை பணிகள் அனைத்தையும் முடிக்க வேண்டும். பின்பு ஐமேக்ஸ் வெளியீட்டு பணிகளும் இருக்கிறது.

ஆகையால் டீசர், ட்ரெய்லர் உள்ளிட்ட எதற்கான பணியையும் நாங்கள் இன்னும் தொடங்கவில்லை. முதலில் வெளியீட்டிற்கான பணிகளை முடித்துவிட்டு, விளம்பரப்படுத்தும் பணிக்குள் வரலாம் என இருக்கிறோம். ஒன்று மட்டும் உறுதி. ஆகஸ்ட் 2-ம் தேதி ‘கூலி’ படத்தின் ட்ரெய்லர் வெளியாகும். அதற்கு முன்பாக டீசர் உள்ளிட்டவை இருக்காது” என்று தெரிவித்துள்ளார் லோகேஷ் கனகராஜ்.

‘கூலி’ படத்தில் ரஜினி, நாகார்ஜுனா, உபேந்திரா, ஆமிர்கான், ஸ்ருதிஹாசன், சவுபின் சாகீர் உள்ளிட்ட பலர் நடித்துள்ளனர். இசையமைப்பாளராக அனிருத் பணிபுரிந்து வருகிறார்.