என்னை ‘பெரிய பாய்’ என அழைப்பது பிடிக்கவில்லை: ஏ.ஆர்.ரஹ்மான்

சமூக வலைதளங்களில் ‘பெரிய பாய்’ என்ற பெயரில் அழைக்கப்படுவது தனக்கு பிடிக்கவில்லை என்று இசையமைப்பாளர் ஏ.ஆர்.ரஹ்மான் தெரிவித்துள்ளார்.

‘தக் லைஃப்’ படத்தை விளம்பரப்படுத்தும் பணிகள் மும்முரமாக நடைபெற்று வருகின்றன. இதற்காக ஏ.ஆர்.ரஹ்மானை டிடி பேட்டி எடுத்துள்ளார். அந்தப் பேட்டியில் “பெரிய பாய் பாட்டுக்கு யார் நோ சொல்வார்கள்” என்று பேச்சில் குறிப்பிட்டார். அதற்கு ஏ.ஆர்.ரஹ்மான் “பெரிய பாயா?” என்று சிரித்தார்.

உடனே டிடி “உங்களுக்கு தெரியாதா... சமூக வலைதளத்தில் உங்களுடைய பெயரே அதான்” என்றார். அதற்கு ஏ.ஆர்.ரஹ்மான் “வேணாம். எனக்குப் பிடிக்கலை. பெரிய பாய், சின்ன பாய்னு...” என்று பதில் அளித்துள்ளார். இந்த வீடியோ பதிவு இணையத்தில் பெரும் வைரலாகி வருகிறது.

சமூக வலைதளத்தில் பலரும் ஏ.ஆர்.ரஹ்மானை குறிப்பிடும் போது ‘பெரிய பாய்’ என்றுதான் செல்லமாக கூறுவார்கள். இதைத்தான் தனக்கு பிடிக்கவில்லை என்று கூறியிருக்கிறார் ஏ.ஆர்.ரஹ்மான்.

தற்போது மணிரத்னம் - ஏ.ஆர்.ரஹ்மான் இணைப்பில் உருவாகியுள்ள ‘தக் லைஃப்’ பாடல்கள் மே 24-ம் தேதி வெளியாகவுள்ளது. சமீபத்தில் வெளியான இப்படத்தின் ட்ரெய்லருக்கு இணையத்தில் பெரும் வரவேற்பு கிடைத்திருக்கிறது.