அதர்வாவின் ‘இதயம் முரளி’ ஃபர்ஸ்ட் லுக் வெளியீடு

அதர்வா நடிக்கும் படத்துக்கு ‘இதயம் முரளி’ எனப் பெயரிடப்பட்டு ஃபர்ஸ்ட் லுக் வெளியிடப்பட்டுள்ளது. முன்னணி தயாரிப்பாளரான ஆகாஷ் பாஸ்கரன் இயக்குநராக அறிமுகமாகவுள்ளார். இதில் அதர்வா நாயகனாக நடித்துள்ளார்.

இதன் ப்ரோமோ வீடியோ படப்பிடிப்பு நடத்தப்பட்டதாக தகவல்கள் வெளியாகின. அப்படத்தின் ஃபர்ஸ்ட் லுக் மற்றும் வீடியோ வெளியீடு எப்போது என்ற தகவல் வெளியாகாமல் இருந்தது. இப்படத்துக்கு ‘இதயம் முரளி - தி ஒன் சைட்’ எனப் பெயரிடப்பட்டு படத்தின் ப்ரோமோ வீடியோவை வெளியிட்டுள்ளது படக்குழு.

சென்னையில் உள்ள கல்லூரி ஒன்றில் இந்த விழா நடைபெற்றது. இதில் படக்குழுவினர் அனைவரும் கலந்துக் கொண்டார்கள். ‘இதயம் முரளி’ படத்தில் அதர்வா, ப்ரீத்தி முகுந்தன், தமன், கயாடு லோகர், நிகாரிகா, ரக்‌ஷன், ஏஞ்சலின், சுதாகர் உள்ளிட்ட பலர் நடித்துள்ளனர்.

இப்படத்தின் மூலம் மீண்டும் நடிகராக களமிறங்குகிறார் தமன். ‘பாய்ஸ்’ படத்துக்குப் பிறகு முழுமையாக இசையில் மட்டுமே கவனம் செலுத்தி வந்தார் தமன். ஆனால், இதில் இசையமைப்பாளராகவும் நடிகராகவும் நடித்துள்ளார்.

இந்த ப்ரோமோ வீடியோ பதிவுக்கு இணையத்தில் நல்ல வரவேற்பு கிடைத்திருக்கிறது. விரைவில் முழுமையாக படப்பிடிப்பை முடித்து வெளியிட படக்குழு முடிவு செய்திருக்கிறது.

ஆகாஷ் பாஸ்கரன் தயாரிப்பில் ‘பராசக்தி’, ‘இட்லி கடை’, ‘எஸ்.டி.ஆர் 49’ உள்ளிட்ட படங்கள் தயாராகி வருகின்றன. அந்தப் டங்களைத் தொடர்ந்து தனது இயக்கத்தில் உருவாகும் ‘இதயம் முரளி’ படத்தினை அவரே தயாரிக்கவுள்ளார்.