கோபி – சுதாகர் இணையும் ‘ஓ காட் பியூட்டிஃபுல்’

‘பரிதாபங்கள்’ கோபி மற்றும் சுதாகர் இணைந்து நடித்து, தயாரித்துள்ள படத்துக்கு ‘ஓ காட் பியூட்டிஃபுல்’ என தலைப்பிடப்பட்டுள்ளது.

யூடியூப் தளத்தில் மிகவும் பிரபலமான தளம் ‘பரிதாபங்கள்’. இதில் வெளியாகும் வீடியோக்கள் கொண்டாடப்பட்டு வருபவர்கள் கோபி மற்றும் சுதாகர் ஜோடி. இந்த இணை ‘பரிதாபங்கள் புரொடக்‌ஷன்ஸ்’ என்ற நிறுவனத்தின் மூலம் படமொன்றை தயாரித்து வந்தது. இதனை புதுமுக இயக்குநர் விஷ்ணு விஜயன் இயக்கி வந்தார்.

தற்போது இதற்கு ‘ஓ காட் பியூட்டிஃபுல்’ என தலைப்பிடப்பட்டு, அதன் அறிமுக டீஸரை வெளியிட்டுள்ளது படக்குழு. இப்படம் கமர்ஷியல் ஃபேன்டஸி, ஃபேமிலி என்டர்டெயினர் படமாக உருவாக்கி இருக்கிறார்கள். ஒரு நடுத்தர குடும்ப வாழ்வில் அன்றாடம் நடக்கும் நிகழ்வுகளில் இருந்து இப்படத்தின் கதை உருவாக்கப்பட்டுள்ளது.

இரு இளைஞர்களின் வாழ்வில் நடக்கும் சம்பவங்களை சொல்லும் இக்கதையில், பரிதாபங்கள் புகழ் கோபி - சுதாகர் முதன்மை பாத்திரங்களில் நடித்துள்ளனர். இவர்களுடன் விடிடி கணேஷ், வின்சு சாம், ரமேஷ் கண்ணா, சுரேஷ் சக்ரவர்த்தி, விஜி சந்திரசேகர், சுபத்ரா ராபர்ட், முருகானந்தம் உள்ளிட்ட பலர் நடித்துள்ளனர்.

இப்படம் சென்னை மற்றும் அதன் சுற்றுபுற பகுதிகளில் படமாக்கப்பட்டுள்ளது. படத்தின் படப்பிடிப்பு முடிந்த நிலையில், படத்தின் இறுதிகட்டப் பணிகள் மும்முரமாக நடைபெற்று வருகின்றன.