வியத்தகு வசூல் சாதனையை நோக்கி ’லோகா’

அதிக வசூல் செய்த மலையாள படம் என்ற சாதனையை ’லோகா’ முறியடிக்குமா என்ற கேள்வி எழுந்துள்ளது.

அதிக வசூல் செய்த மலையாள படங்களுள் ‘எம்புரான்’, ‘மஞ்சும்மல் பாய்ஸ்’ மற்றும் ‘துடரும்’ ஆகிய படங்கள் முதல் மூன்று இடத்தில் இருக்கின்றன. இவை அனைத்துமே ரூ.200 கோடி வசூலைத் தாண்டியவை என்பது குறிப்பிடத்தக்கது. தற்போது ‘லோகா’ படமும் ரூ.200 கோடி வசூலை கடந்திருக்கிறது. விரைவில் ‘துடரும்’ மற்றும் ‘மஞ்சும்மல் பாய்ஸ்’ வசூலை முறியடிக்கும் என்று எதிர்பார்க்கப்படுகிறது.

ஆனால், ‘எம்புரான்’ வசூலை முறியடிக்குமா என்பது கேள்விக்குறியாக இருக்கிறது. சில வர்த்தக நிபுணர்கள் கண்டிப்பாக முறியடிக்க வாய்ப்பு இருப்பதாக கூறியிருக்கிறார்கள். ஏனென்றால், இன்னும் சில வாரங்களுக்கு பெரிய நடிகர்களின் படங்கள் எதுவும் மலையாளத்தில் வெளியீடு இல்லை. இந்த வசூலால் படக்குழுவினர் பெரும் உற்சாகத்தில் இருக்கிறார்கள். மேலும் 2-ம் பாகத்துக்கான பணிகளை விரைவில் தொடங்கவுள்ளது படக்குழு.

துல்கர் சல்மான் தயாரிப்பில் வெளியான படம் ‘லோகா சாப்டர் 1: சந்திரா’. இதில் கல்யாணி பிரியதர்ஷன் சூப்பர் ஹீரோவாக நடித்திருக்கிறார். ‘பிரேமலு’ நஸ்லன், சாண்டி, சந்து சலீம் குமார், அருண் குரியன், சாந்தி பாலச்சந்திரன் உள்ளிட்டோர் முக்கிய வேடங்களில் நடித்துள்ளனர். டாமினிக் அருண் இயக்கியிருந்த இப்படத்துக்கு ஒளிப்பதிவாளராக நிமிஷ் ரவி, இசையமைப்பாளராக ஜேக்ஸ் பீஜாய் ஆகியோர் பணிபுரிந்துள்ளனர்.