ஏ.ஆர்.ரஹ்மான் மாற்றமா? - ‘RC16’ படக்குழு மறுப்பு

ஏ.ஆர்.ரஹ்மான் மாற்றப்பட்டதாக வெளியான தகவலுக்கு ‘RC16’ படக்குழு மறுப்பு தெரிவித்திருக்கிறது.

கடந்த சில தினங்களாக ராம் சரண் நடிக்கவுள்ள அடுத்த படத்திலிருந்து ஏ.ஆர்.ரஹ்மான் மாற்றப்பட்டு, அவருக்கு பதிலாக தேவி ஸ்ரீ பிரசாத் இசையமைக்கவுள்ளார் என்று தகவல்கள் பரவின. ஏனென்றால் இதன் இயக்குநர் புஜ்ஜி பாபு சனா இயக்கிய ‘உப்பெனா’ படத்திற்கு இசையமைத்தது தேவி ஸ்ரீ பிரசாத் தான். அப்படத்தின் பாடல்கள் இணையத்தில் கொண்டாடப்பட்டன.

இந்தக் கூட்டணியின் வெற்றியால், ஏ.ஆர்.ரஹ்மான் மாற்றப்பட்டதாக வெளியான செய்தி உண்மையாக இருக்கும் என கருதப்பட்டது. தற்போது இது குறித்து “ஏ.ஆர்.ரஹ்மான் மாற்றம் குறித்து வெளியான செய்தியில் உண்மையில்லை. அது வெறும் வதந்தியே” என்று படக்குழு சார்பில் தெரிவிக்கப்பட்டுள்ளது. இதன் மூலம் ஏ.ஆர்.ரஹ்மான் மாற்றம் குறித்த வதந்திக்கு முற்றுப்புள்ளி வைக்கப்பட்டு இருக்கிறது.

மைத்ரி மூவி மேக்கர்ஸ் நிறுவனம் தயாரித்து வரும் இப்படத்தில் ராம் சரணுக்கு ஜோடியாக ஜான்வி கபூர் நடிக்கவுள்ளார். மேலும் சிவராஜ்குமார், ஜெகபதி பாபு உள்ளிட்ட பலர் இப்படத்தில் முக்கிய கதாபாத்திரத்தில் நடிக்கவுள்ளார்கள். இதன் படப்பூஜை முடிவுற்று படப்பிடிப்பும் தொடங்கப்பட்டது. தற்போது இதன் அடுத்தகட்ட படப்பிடிப்பு ஜனவரி 27ம் தேதி முதல் தொடர்ச்சியாக நடைபெறவுள்ளது.