‘கேம் சேஞ்சர்’ விமர்சனங்கள்: இயக்குநர் ஷங்கர் கருத்து

‘கேம் சேஞ்சர்’ படத்தின் விமர்சனங்கள் குறித்து அந்தப் படத்தின் இயக்குநர் ஷங்கர் கருத்து தெரிவித்துள்ளார்.

இந்தியளவில் பெரும் எதிர்பார்ப்புக்குரிய படமாக வெளியான ‘கேம் சேஞ்சர்’, விமர்சன ரீதியாக பெரும் பின்னடைவை சந்தித்தது. இதனால் படத்தின் வசூலும் எதிர்பார்த்த வகையில் அமையவில்லை. இது படக்குழுவினரை பெரும் அதிர்ச்சிக்குள்ளாக்கியது.

‘கேம் சேஞ்சர்’ படத்தின் இணைய விமர்சனங்கள் குறித்து இயக்குநர் ஷங்கர் “விமர்சனங்களைப் பார்க்கவில்லை. என் காதுக்கு வரும் விமர்சனங்களைக் கேட்டுக் கொள்கிறேன். இதரவற்றை பார்க்கவில்லை. என் காதுக்கு நல்ல விமர்சனங்கள் மட்டும் தான் வந்துக் கொண்டிருக்கிறது” என்று தெரிவித்துள்ளார். இந்த வீடியோ பதிவு இணையத்தில் ட்ரெண்ட்டிங்காகி வருகிறது.

‘இந்தியன் 2’ படத்துக்குப் பிறகு, ‘கேம் சேஞ்சர்’ படத்துக்கும் கடும் எதிர்மறை விமர்சனங்கள் வந்துள்ளது. இதில் ராம்சரண், எஸ்.ஜே.சூர்யா, கைரா அத்வானி, அஞ்சலி, சமுத்திரக்கனி உள்ளிட்ட பலர் நடித்துள்ளனர். தில் ராஜு தயாரித்துள்ள இப்படத்துக்கு தமன் இசையமைத்துள்ளார்.