The Thin Man series : அங்க அடையாளத்தில் சிக்கும் குற்றவாளி | ஹாலிவுட் மேட்னி 3

த தின் மேன் வரிசையில் இரண்டாவது படம், 'ஆஃப்டர் த தின் மேன்' (After the Thin Man-1936). புத்தாண்டு கொண்டாட்டத்தில் கொல்லப் பட்டவனின் மர்மத்தை கண்டறிவதுதான் இப்படம். முதல் பாகத்தில் நிக்​, நோரா தம்பதியர் ஹனிமூனுக்​குச் செல்வதோடு முடியும் கதை, இதில் சான்ஃபிரான்சிஸ்கோ வருவதோடு ஆரம்பிக்​கிறது. ரயில்வே ஸ்டேஷனில் நிக்​-கைப் பார்க்​கும் மக்​கள் "தின் மேன் கேஸை கண்டுபிடித்ததால் மறுபடியும் துப்பறியக்​ கிளம்பி விட்டீர்களா?" என்றெல்லாம் உற்சாகத்துடன் கேட்கிறார்கள்.

“அந்த ஐடியாவே இல்லை” என்று பதிலளிக்​கும் நிக்​கிற்கு அடுத்த வழக்​கு, நோராவின் ஆன்ட்டி வீட்டிலேயே காத்திருக்​கிறது. நோராவின் ஆன்ட்டி கேத்தரின் வைக்​கும் விருந்தில் குடும்பத்தினர் அனைவரும் கலந்து கொள்கிறார்கள். புலம்பெயர்ந்த குடும்பத்தைச் சேர்ந்தவர் மற்றும் போலீஸ் துறையோடு தொடர்புடையவர் என்பதால் நிக்​-கை, கேத்தரினுக்​கு அவ்வளவாகப் பிடிக்​காது. ஆனாலும் குடும்ப கவுரவம் கருதி வரவழைக்​கிறாள்.

நோராவின் கஸின் செல்மா, தன் கணவர் ராபர்ட்டை காணவில்லை என்று நிக்​-கிடம் சொல்கிறாள். ராபர்ட் வழக்​கமாகச் செல்லும் சீன நைட் கிளப்புக்​கு நிக்​கும், நோராவும் செல்கிறார்கள். பாலி என்ற நட்சத்திர பாடகியின் துள்ளல் ஆட்டத்தை மொத்தக்​ கூட்டமும் ரசித்துக்​ கொண்டிருக்​கிறது. ராபர்ட், ஒரு டேபிளில் அமர்ந்திருக்​க, நிக்​கும், நோராவும் அவனெதிரே அமர்கிறார்கள். செல்மா, அவனைக்​ காணாமல் கவலைப்படுவதாக நோரா சொல்கிறாள்.

இதையடுத்து செல்மாவின் வீட்டுக்​கு வரும் ராபர்ட், தன் உடமைகளை எடுத்துச் செல்கிறான். டேவிட் கிரஹாம் என்பவனுக்​கும் செல்மாவுக்​கும் ஏற்கெனவே நிச்சயம் செய்து நின்று போயிருக்​கிறது. செல்மாவை மறக்​க முடியாத டேவிட், பாலிக்​கும், ராபர்ட்டுக்​கும் தொடர்பு இருப்பதைத் தெரிந்து கொண்டு, செல்மாவை விவாகரத்து செய்தால் 25 ஆயிரம் டாலர் கொடுப்பதாக பேரம்பேச, ராபர்ட்டும் ஒப்புக்​ கொள்கிறான். ஆனால், பாலியும், கிளப்பின் உரிமையாளர் டான்சர் என்பவனும் ராபர்ட்டின் பணத்தை அபகரிக்​கத் திட்டம் தீட்டுகிறார்கள்.

இந்நிலையில் ராபர்ட், செல்மாவைச் சந்தித்து, ’குட்பை’ சொல்லிக்​ கிளம்ப, அதிர்ச்சியடைந்த செல்மா துப்பாக்​கியுடன் பின் தொடர்கிறாள். பனி படர்ந்த இரவில் புது வருடம் பிறக்​கும்போது ராபர்ட் கொல்லப்படுகிறான். கையில் வெடிக்​காத துப்பாக்​கியுடன் இருக்​கும் செல்மா குற்றவாளி என்ற செய்தி பரபரப்பாகிறது. பாலியின் சகோதரன் 'ஃபில்’லைத்தேடி நிக்​ செல்ல, அவன் கொல்லப்பட்டிருக்​கிறான். அவன் வீட்டை நிக்​ சோதனை போடும்போது, அங்கே மறைந்திருந்த டான்சர், நிக்​கை சுடுகிறான்.

குண்டு பட்டு பழைய பெட்டியொன்று திறந்து, அதிலிருந்து ஒரு சடலம் விழுகிறது. அது நோரா அப்பாவின் எஸ்டேட்டில் 6 ஆண்டுகளுக்​கு முன்பு தோட்டவேலை பார்த்த ‘பேட்ரோ’. ஒரு கொலையை கண்டுபிடிக்​கச் சென்று மேலும் இரண்டு கொலைகள். முடிவில் நிக்​ நோராவிடம் "கொலையைச் செய்தவனை நாளை கண்டுபிடிக்​கப் போகிறேன்” என்கிறார்.

தின்மேன் சீரிஸின் 'டெம்ப்ளேட்’ கிளைமாக்​ஸ். ஏப்ரம்ஸ் உதவியுடன் அனைத்து சந்தேக நபர்களையும் பாலியின் வீட்டுக்​கு வரவழைக்​கிறார்கள். அனைவரிடமும் நிக்​ சில கேள்விகளை வீசுகிறார். பேட்ரோவின் அங்க அடையாளம் பற்றி கேட்கும்போது கிடைத்த க்​ளுவில் குற்றவாளி சிக்​குகிறான். முதல் பாகத்தில் வைனன்ட்டைக்​ கொன்றது, உடன் இருக்​கும் நபர்.

இதிலும் ராபர்ட்டைக்​ கொன்றது கூடவே இருக்​கும் ஓர் அப்பாவி. முதல் பாகத்தில் கிறிஸ்துமஸ் விழாவில் பணத்தை அபகரிக்​க கொலைகள் நடக்​கும். இதில் புது வருடக்​ கொண்டாட்டத்தில், தான் நேசித்தவளை அடைய நடக்​கிறது. ஆஸ்கர் விருது வென்ற ஜேம்ஸ் ஸ்டீவர்ட் என்ற மாபெரும் நடிகர், இதில் டேவிட் என்ற துணை கதாபாத்திரத்தில் நடித்திருக்​கிறார். பரபரப்புக்​கு நடுவே, நிக்​, நோராவின் கட்டிப்பிடி, முத்தங்கள் நம்மை ரிலாக்​ஸ் பண்ணுகின்றன. நோரா, தான் கர்ப்பமாக இருப்பதை நிக்​-கிற்கு குட்டி சாக்​ஸ் பின்னுவதன் மூலம் சிம்பாலிக்​காக உணர்த்துகிறாள்.

அஸ்டா அண்ட் மிஸஸ் அஸ்டா என்று டைட்டில் போடுகிறார்கள். அஸ்டாவுக்​குப் பிறந்த பல குட்டிகளில் ஒரு கருப்பு நாய்க்​ குட்டியும் உண்டு. அப்பா கருப்பு நாய் அவ்வப்போது மிஸஸ் அஸ்டாவைத் தேடி வர, அஸ்டா அதைத் துரத்தி விரட்டி அது வரும் பாதையை மூடி வைக்​கும். கல்லில் கட்டி எறியப்பட்ட பேப்பரை அஸ்டா வாயில் கவ்வியபடி நிக்​, நோராவை அலைக்​கழிப்பது விலா நோக வைக்​கும் காமெடி.

ஓலிவர் மார்ஷின் இருளும், ஒளியும் கலந்த ஒளிப்பதிவில் காட்சிகளின் சஸ்பென்ஸ் மேலும் அதிகரிக்​கிறது. ராபர்ட் கொல்லப்படும் காட்சியில் பனிபடர்ந்த இரவும், ஆரம்பத்தில் வரும் ரயில் விஷுவலும் வியக்​க வைக்​கும். இசையும், ஒளிப்பதிவும் போட்டிப் போட்டு பரபரப்பாக்​குகின்றன.

ஹெர்பர்ட் ஸ்டோதார்ட் மற்றும் எட்வர்ட் வார்டு இசை நைட்கிளப், பார்ட்டி, புத்தாண்டு பாடல் என்று இசை நம்மை குதூகலப் படுத்துவதோடு, தேவைப்பட்ட இடங்களில் பதற்றப்படவும் வைக்​கிறது. டபிள்யூ எஸ். வான்டைக்​ இயக்​கியுள்ள இதன் கதாசிரியர் டேஷியல் ஹேமெட். முந்தைய பாகத்துக்​கு எழுதிய அதே ஜோடிதான். எம்ஜிஎம்மின் பிரம்மாண்ட தயாரிப்பு. கருப்பு வெள்ளை கிளாசிக்​ பட விரும்பிகள் இந்தப் படத்தை ரசிக்​கலாம்.

(செவ்வாய்தோறும் படம் பார்ப்போம்)

தொடர்புக்கு - ramkumaraundipatty@gmail.com

முந்தைய அத்தியாயம் > த தின் மேன் - 1934: ஒரு வார்த்தையில் சிக்கும் குற்றவாளி | ஹாலிவுட் மேட்னி