ஓ காதல் கண்மணி இந்தி ரீமேக்கான ஓ.கே ஜானு பர்ஸ்ட் லுக் வெளியீடு

'ஓ காதல் கண்மணி' படத்தின் இந்தி ரீமேக்கான 'ஓகே ஜானு' பர்ஸ்ட் லுக் வெளியிடப்பட்டு இருக்கிறது. திரைப்படம் ஜனவரி 13, 2017ல் வெளியாகிறது.

மணிரத்னம் இயக்கத்தில் துல்கர் சல்மான், நித்யா மேனன், பிரகாஷ்ராஜ் உள்ளிட்ட பலர் நடிப்பில் வெளியான படம் 'ஓ காதல் கண்மணி'. பி.சி.ஸ்ரீராம் ஒளிப்பதிவு செய்த இப்படத்துக்கு ஏ.ஆர்.ரஹ்மான் இசையமைத்திருந்தார். மெட்ராஸ் டாக்கீஸ் நிறுவனம் தயாரித்த இப்படத்தை ஸ்டூடியோ க்ரீன் நிறுவனம் வெளியிட்டது.

விமர்சன ரீதியாகவும், வசூல் ரீதியாகவும் இப்படம் பெரும் வரவேற்பைப் பெற்றது. ஏ.ஆர்.ரஹ்மான் இசையில் வெளியான பாடல்களுக்கு இளைஞர்கள் மத்தியில் நல்ல வரவேற்பு கிடைத்தது.

மணிரத்னம் இயக்கிய 'தில் சே' மற்றும் 'ராவணா' இந்தி படங்களில் இணை இயக்குநராக பணியாற்றிய ஷாத் அலி(Shaad Ali) இத்திரைப்படத்தின் இந்தி ரீமேக்கை இயக்கியிருக்கிறார். 'ஆஷிக்கி 2(AASHIQUI 2 )' படத்தின் ஜோடியான ஆதித்யா ராய் கபூர் மற்றும் ஷ்ரதா கபூர் இருவரும் இப்படத்தில் நடித்திருக்கிறார்கள்.

ரவி.கே. சந்திரன் ஒளிப்பதிவு செய்திருக்கும் இப்படத்துக்கு ஏ.ஆர்.ரஹ்மான் இசையமைத்திருக்கிறார். பாக்ஸ் ஸ்டார் ஸ்டூடியோஸ் நிறுவனம் வழங்க கரண் ஜோஹர் மற்றும் மணிரத்னம் இருவரும் இணைந்து தயாரித்துள்ளார்கள்.

இப்படத்தின் பர்ஸ்ட் லுக் போஸ்டர் இணையத்தில் வெளியிடப்பட்டு இருக்கிறது. மேலும், 2017ம் ஆண்டு ஜனவரி 13ம் தேதி இப்படம் வெளியாகும் என போஸ்டரில் குறிப்பிட்டுள்ளார்கள்.