டிஎன்பிஎஸ்சி குரூப் 2 முதல் நிலைத் தேர்வு - இன்ப அதிர்ச்சி தந்த எளிய வினாக்கள்!

எப்போதும் போல டிஎன்பிஎஸ்சி குரூப் 2 முதல் நிலைத் தேர்வு, எந்த சச்சரவும் இன்றி சிறப்பாக நடந்து முடிந்துள்ளது. போட்டித் தேர்வுகளைத் திறம்பட நேர்த்தியாக நடத்துவதில் தனக்குள்ள நிபுணத்துவத்தைத் தமிழ்நாடு அரசுப் பணியாளர் தேர்வாணையம் (டிஎன்பிஎஸ்சி) மீண்டும் ஒருமுறை ஐயத்துக்கு இடமின்றி நிரூபித்து இருக்கிறது. வாழ்த்துக்கள்.

பொதுத்தமிழ் (அ) பொது ஆங்கிலம்; மற்றும் பொது அறிவு / திறனறிவு என்று இரண்டு பகுதிகள். ஒவ்வொன்றிலும், சம மதிப்பெண்கள் கொண்ட நூறு வினாக்கள். தவறான விடைக்கு, மதிப்பெண் குறைப்பு இல்லை. கேள்வித்தாளைப் பார்த்த மாத்திரத்தில் தோன்றுகிற முதல் எண்ணமே - ‘ஆஹா... எத்தனை எளிதாக இருக்கிறது!'.

ஆனால், கூடவே ஒரு ஆபத்தும் இருக்கிறது. மிக அதிக மதிப்பெண்கள் பெற்றால் மட்டுமே அடுத்த நிலைக்குச் செல்ல முடியும். அதாவது ‘கட் ஆப்' மதிப்பெண், வழக்கத்தை விட அதிகமாக இருக்கவே வாய்ப்புகள் அதிகம். தனித்தனியே வினாக்களைப் பார்ப்பதற்கு முன்பு... வினாத்தாளில் அரசியல் கலப்பு அநேகமாக அறவே இல்லை. மாநில அரசுத் திட்டங்கள் தொடர்பான ஓரிரு வினாக்களும் ‘ஏற்றுக் கொள்ளத்தக்க' அளவிலேயே இருந்தன.

பொதுத் தமிழ் / பொது ஆங்கிலப் பகுதி - பெரும்பாலும் பள்ளிப் பாடத் திட்டத்தை ஒட்டியே இருந்தன. பொதுத்தமிழைப் பொருத்தமட்டில், அகர வரிசைப்படி சொற்கள், சேர்த்து எழுதுதல், பிரித்து எழுதுதல், ஒற்றுப் பிழை சரி செய்தல், பிழையற்ற தொடர் காணுதல், எதிர்ச்சொல் கண்டறிதல் என்று நன்கு பழகிய பாதையிலேயே பயணித்தது.

வணிக மேலாண்மை தொடர்பான ஆங்கிலச் சொற்கள் மற்றும் வெவ்வேறு ஆங்கிலச் சொற்களின் தமிழாக்கம் முற்றிலும் தமிழ் வழியே பயின்ற கிராமத்துத் தேர்வர்களுக்குக் கடினமாக இருந்திருக்கக் கூடும். அந்த வகையில், பொது ஆங்கிலத் தாள், தமிழை விடவும் எளிதாக இருக்க வாய்ப்புகள் அதிகம் என்று தோன்றுகிறது. தவிர்த்து இருக்கலாம்.

அடுத்து - பொது அறிவு / திறனறிவு. அறிவியல், கணிதம், வரலாறு பகுதிகளில் ‘நேரடிக் கேள்விகள்' மிகுந்து இருந்தன. ஆனால், பொருளாதாரம் மற்றும் சட்டங்கள் தொடர்பான வினாக்கள் சற்றே உயர் தரத்தில் இருந்தன. இவை, சிலருக்கேனும் ஓரளவுக்குக் கடினமாக இருந்திருக்கக் கூடும். குளோரோஃபார்ம், கண்ணீர்ப்புகை, உயிரினங்களில் கார்பன், மின் காந்தங்களில் காந்தப் பண்புகள் ஆகியன அறிவியல் அறிவுக்கு ஏற்ற கேள்விகள்.

கணிதப் பகுதிதான் உண்மையில் இத்தேர்வை மிக எளிமை ஆக்கியுள்ளது. ஆட்கள்-வேலை, விகிதாச்சாரம், சராசரி, வட்டி விகிதம் மீதான கேள்விகள், குறிப்பாக கிராமப்புறத் தேர்வர்களுக்கு, மிகுந்த மகிழ்ச்சி, நம்பிக்கை தந்திருக்கும். உ.வே.சா.வின் வாழ்க்கை வரலாற்று நூலின் பெயர், ‘வண்ணப் பெட்டிகள்', பெண்களின் பங்களிப்பு பற்றிய பத்தி அதனைத் தொடர்ந்து கேள்விகள், இந்திய தேசிய காங்கிரஸின் நிறுவனர் உள்ளிட்ட பல வினாக்கள் குரூப்-2 தேர்வர்களுக்கு மிகச் சாதாரணம்.

அதிலும், கோயம்புத்தூர், மதுரை, நாமக்கல், தஞ்சாவூர் தொடர்பான கேள்வி, அநியாயத்துக்கு எளிதானது! சட்டங்கள், குறிப்பாக இந்திய சாசனம் தொடர்பான வினாக்கள் எல்லாமே, போட்டித் தேர்வுக்கு என்று சற்றேனும் தீவிரத்துடன் தம்மைத் தயார்ப் படுத்திக் கொள்கிற தேர்வர்களுக்கு (மட்டுமே) எளிதாக இருந்திருக்கும்.

அவர்களுக்குமே கூட, முன்னுரிமை அட்டவணை வரிசையில் சரியான வரிசை ஒழுங்கு, அடிப்படைக் கடமையைக் கொண்டு வந்த சாசனத் திருத்தம், தமிழ்நாடு பஞ்சாயத்துகள் சட்டம், வெவ்வேறு ஆணையங்கள் ஏற்படுத்தப்பட்ட ஆண்டு உள்ளிட்டவை சற்றே சவாலாக இருந்திருக்கக் கூடும்.

மகளிர் இட ஒதுக்கீடு மசோதாவின் முக்கிய அம்சங்கள், தேசிய சுகாதார சேவை, தேசிய விவசாய சந்தை, தேசிய திறன் மேம்பாட்டுக் கழகம், தமிழ்நாடு கிராம வாழ்விட மேம்பாடு, ‘இடம்பெயர்வு’ தொடர்பான வினாக்கள் மூலம், வினாத்தாள் தயாரிப்பில் காட்டப்பட்ட ‘அக்கறை' நன்கு வெளிப்பட்டது.

ஏப்ரல் 29 முதல் மே 5 வரை பிறந்தநாள் கொண்டாட்டம், மகளிர் உரிமைத் தொகையின் நோக்கம், ‘நம்மைக் காக்கும் 48' திட்டத்தில் கட்டணமில்லா சிகிச்சையின் உச்சவரம்பு, தமிழ்நாட்டில் உள்ள முக்கிய குறிப்பிடத்தக்க எரிசக்தி ஆதாரம் ஆகியன மிகுந்த பொறுப்புணர்வுடன் முன்வைக்கப் பட்டுள்ளன. பாராட்டுக்கள்.

‘தூய்மை இந்தியா இயக்கம்' என்று தூய தமிழில் தராமல், ‘ஸ்வச் பாரத் மிஷன்' என்று விளிக்க வேண்டிய அவசியம் என்ன..? ‘நார்டிக்ஸ்' என்று ஆங்கில மொழியிலேயே ஏன் குறிப்பிட வேண்டும்...? இவையெல்லாம் தவறு இல்லை; ஆனால் தவிர்த்து இருக்கலாம். மற்றபடி, ஒட்டுமொத்தமாய்ப் பார்க்கையில், பெரிய அளவு தவறு (அ) பிழை ஏதும் இல்லை. வினாத்தாள் தயாரிப்பில், நல்ல முன்னேற்றம் நன்கு தெரிகிறது. ஆணையத்துக்கு மனமார்ந்த பாராட்டுக்கள்.

‘சுவாரஸ்யமான கேள்வி' என்று முத்திரையிட முடியாது என்றாலும் ‘யோசிக்கிறேன்..' என்கிற வகையில் உள்ள ஒரு வினா:

அப்பாவி என்னும் சொல் பிழை எனில், அச்சொல்லின் திருத்தச் சொல்லைக் காண்க:

அ) அடப்பாவி, ஆ) அற்பாவி, இ) அற்ப பாவி, ஈ) அற்ப ஆவி, உ) விடை தெரியவில்லை!

கருத்தைப் பதிவு செய்ய

லேட்டஸ்ட் அப்டேட்களுக்கு இந்து தமிழ்திசை வாட்ஸ்அப் சேனலை Follow செய்யுங்கள்...
Follow