கடல் உணவு பொருள் ஏற்றுமதியாளர்கள் புதிய சந்தையை தேட வேண்டும்: மத்திய அமைச்சர் ராஜீவ் ரஞ்ஜன் சிங் வலியுறுத்தல்

புதுடெல்லி: இந்​திய பொருட்​களுக்கு அமெரிக்க அதிபர் டொ​னால்டு ட்ரம்ப் 50 சதவீத வரி விதிப்பை அறி​வித்​துள்ள நிலை​யில், அது இந்​திய கடல் உணவுப் பொருட்​கள் ஏற்​றும​தி​யில் கடும் தாக்​கத்தை ஏற்​படுத்​தும் என்று எதிர்​பார்க்​கப்​படு​கிறது. இந்த நிலை​யில், புதிய சந்​தைகளை தேடு​மாறு ஏற்​றும​தி​யாளர்​களை மத்​திய அரசு வலி​யுறுத்​தி​யுள்​ளது

இதுகுறித்து மத்​திய மீன்​வளம் மற்​றும் கால்​நடை பராமரிப்பு துறை அமைச்​சர் ராஜீவ் ரஞ்​ஜன் சிங், கடல் உணவு ஏற்றுமதியாளர்களு​டன் நடை​பெற்ற சந்​திப்​பின்​போது கூறிய​தாவது: தற்​போதைய சூழலை ஏற்​றும​தி​யாளர்​கள் தைரி​யத்​துடன் எதிர்​கொள்ள வேண்​டும். இந்​திய இறால் மற்​றும் பிற மீன் வகைகளுக்கு உலகள​வில் நல்ல வரவேற்பு உள்​ளது. இதனால், ஏராளமான மாற்று சந்தை வாய்ப்​பு​கள் உள்​ளன.

இதனை கருத்​தில் கொண்டு புதிய சந்​தைகளை கைப்​பற்​று​வ​தில் ஏற்றுமதியாளர்​கள் தீவிர​மாக செயல்பட வேண்​டும். இவ்​வாறு ராஜீவ் கூறி​னார். அமெரிக்கா​வுக்​கான பதப்​படுத்​தப்​பட்ட இறால் ஏற்​றும​தி​யில் இந்​தியா தற்​போது முன்​னிலை​யில் உள்​ளது. இதன் சந்​தைப் பங்கு 2015-ல் 24.4%-ஆக இருந்த நிலை​யில் 2024 -ல் 40.6% -ஆக கணிச​மாக அதி​கரித்​துள்​ளது.

இந்​தநிலை​யில், அமெரிக்​கா​வின் அதிக வரி விதிப்​பின் காரண​மாக இந்​தி​யா​வின் சந்​தைப் பங்கு கடுமை​யாக பாதிக்​கப்​படும் சூழல் ஏற்​பட்​டுள்​ளது. இதனால், இந்​திய ஏற்​றும​தி​யாளர்​கள் மாற்று சந்​தைகளை தேட வேண்​டிய நிலைக்கு தள்​ளப்​பட்​டுள்​ளனர். இந்​தி​யா​வின் சந்தை வரம்பை விரிவுபடுத்​து​வதற்​கான ஒரு உத்​தியை வகுக்க ஏற்​றும​தி​யாளர்​களு​டன் மத்​திய அரசு பேச்​சு​வார்த்தை​யில் ஈடு​பட்​டுள்​ளது.

மாற்று சந்​தைகளாக இங்​கிலாந்​து, ஐரோப்​பிய ஒன்​றி​யம், ஓமன், ஐக்​கிய அரபு அமீரகம், தென் கொரி​யா, ரஷ்​யா, சீனா ஆகியவை அடை​யாளம் காணப்​பட்​டுள்​ளன. இதற்​காக, மதிப்​புக் கூட்​டல், பதப்​படுத்​துதல், பேக்​கேஜிங் வசதி​களை மேம்படுத்தவும், வலுப்​படுத்​த​வும் மீன்வள உட்​கட்​டமைப்பு நிதியை பயன்​படுத்​திக் கொள்​ளு​மாறு ஏற்​றும​தி​யாளர்​களை மத்​திய அரசு கேட்​டுக்​கொண்​டுள்​ளது.

இந்​தி​யா​வின் வரு​டாந்​திர மீன் உற்​பத்தி 104% என்ற உயர் வளர்ச்​சியை எட்​டி​யுள்​ளது. 2013-14-ல் 96 லட்​சம் டன்​னாக இருந்த மீன் உற்பத்தி 2024-25-ல் 195 லட்​சம் டன்​னாக அதி​கரித்​துள்​ளது. 2023-24 நிதி​யாண்​டில் ரூ.60,524 கோடி மதிப்​புள்ள 17.81 லட்​சம் மெட்​ரிக்டன் கடல் உணவு​களை இந்​தியா ஏற்​றுமதி செய்​துள்​ளது.