இன்போசிஸ் நிறுவன பங்கு மதிப்பைவிட பாகிஸ்தான் பங்குச் சந்தையின் மொத்த சந்தை மதிப்பு குறைவு

மும்பை: இன்போசிஸ் நிறுவன பங்கு மதிப்பைவிட பாகிஸ்தான் பங்குச் சந்தையின் மொத்த சந்தை மதிப்பு குறைவாக உள்ளது. இந்திய ராணுவ வலிமையுடன் ஒப்பிடும்போது பாகிஸ்தானின் ராணுவ வலிமை பலவீனமாக உள்ளது.

இந்தியா, பாகிஸ்தான் இடையே சமீபத்தில் ஏற்பட்ட மோதலில் இது வெட்டவெளிச்சமானது. இதுபோல பொருளாதார ரீதியிலும் இரு நாடுகளுக்கும் இடையே மிகப்பெரிய இடைவெளி உள்ளது. இந்திய பொருளாதாரத்தின் மொத்த மதிப்பு 4 லட்சம் கோடி டாலராக (ரூ.340 லட்சம் கோடி) உள்ள நிலையில் பாகிஸ்தான் பொருளாதாரத்தின் மதிப்பு வெறும் 350 பில்லியன் டாலராக (ரூ.29.7 லட்சம் கோடி) உள்ளது.

இதுபோல இந்தியாவுடன் ஒப்பிடும்போது பாகிஸ்தான் பங்குச் சந்தையின் மதிப்பும் மிகவும் சொற்பமானதுதான். அந்நாட்டு பங்குச் சந்தையில் (பிஎஸ்எக்ஸ்) உள்ள 476 முன்னணி நிறுவனங்களின் ஒட்டுமொத்த பங்கு மதிப்பு வெறும் ரூ.5.66 லட்சம் கோடி மட்டுமே. இது இந்தியாவைச் சேர்ந்த தகவல் தொழில்நுட்ப நிறுவனமான இன்போசிஸ் பங்கு மதிப்பான ரூ.6.26 லட்சம் கோடியைவிட (வெள்ளிக்கிழமை நிலவரம்) குறைவு ஆகும். பாகிஸ்தானின் ஒரு ரூபாயின் இந்திய மதிப்பு வெறும் ரூ.30 பைசாதான்.

இதுபோல பாகிஸ்தானின் மற்றொரு பங்குச் சந்தையான கராச்சி பங்குச் சந்தையின் (கேஎஸ்இ) ஒட்டு மொத்த மதிப்பு ரூ.3.31 லட்சம் கோடியாகும். இது இந்தியாவின் அல்ட்ராடெக் நிறுவன மதிப்பான ரூ.3.34 லட்சம் கோடியைவிட குறைவு ஆகும்.

பாகிஸ்தானின் மிகப்பெரிய நிறுவனமான, அரசுக்கு சொந்தமான எண்ணெய் மற்றும் எரிவாயு மேம்பாட்டு நிறுவனத்தின் சந்தை மதிப்பு ரூ.23,812 கோடியாக உள்ளது. இது இந்தியாவின் மிகப்பெரிய ரிலையன்ஸ் இண்டஸ்ட்ரீஸ் நிறுவனத்தின் மதிப்பில் (ரூ.18.64 லட்சம் கோடி) வெறும் 1.28% ஆகும்.