எகிறும் தங்கம் விலை - ஒரு பவுன் ரூ.69 ஆயிரத்தை நெருங்குகிறது!

சென்னை: தங்கம் விலை 4-வது நாளாக இன்றும் (ஏப்.3) உயர்ந்துள்ளது. சென்னையில் 22 கேரட் ஆபரணத் தங்கத்தின் விலை ஒரு பவுன் ரூ.69,000-ஐ நெருங்கியுள்ளது.

சர்வதேச பொருளாதார நிலவரத்துக்கு ஏற்ப இந்தியாவில் தங்கம் விலை உயர்ந்தும், குறைந்தும் வருகிறது. கடந்த மாதம் 16-ம் தேதி ஒரு பவுன் ரூ.63,120-க்கு விற்பனையானது. பின்னர், படிப்படியாக அதிகரித்து ரூ.64,440-க்கு விற்பனையானது. கடந்த வாரம் சனிக்கிழமை ஒரு பவுன் ரூ.66,880 ஆக இருந்தது.

ஆனால் இந்த வார தொடக்கத்தின் முதல் தங்கம் விலை கடுமையாக உயர்ந்து வருகிறது. திங்கள் கிழமை ரூ.67,600, செவ்வாய்க்கிழமை ரூ.68.080 என்று புதிய உச்சங்களைத் தொட்ட தங்கம் விலை இன்று வியாழக்கிழமை ஒரு பவுன் ரூ.68,480-க்கு விற்பனையாகிறது. இதனால் கடந்த 4 நாட்களில் மட்டும் தங்கம் பவுனுக்கு ரூ.1,600 அதிகரித்துள்ளது.

சென்னையில் 22 கேரட் ஆபரணத் தங்கம் இன்று ஒரு கிராம் 8,560-க்கும், ஒரு பவுன் ரூ.68,480-க்கும் விற்பனையாகிறது. வெள்ளி விலை ரூ.2 குறைந்து ஒரு கிராம் ரூ.112-க்கும், கட்டி வெள்ளி ஒரு கிலோ ரூ.1,12,000-க்கும் விற்பனையாகிறது.