இன்டெல் நிறுவனத்தின் புதிய சிஇஓ சம்பளம் ரூ.600 கோடி

அமெரிக்காவின் இன்டல் கார்ப்பரேஷன் நிறுவனத்தின் தலைமைச் செயல் அதிகாரியாக (சிஇஓ) இருந்த பாட் கெல்சிங்கர் சமீபத்தில் பதவி நீக்கம் செய்யப்பட்டார். இதையடுத்து, புதிய சிஇஓ-வாக லிப்-பு டான் நியமிக்கப்பட்டுள்ளார். அவருக்கு ஆண்டு சம்பளமாக ரூ.600 கோடி வரை கிடைக்கும் என கூறப்படுகிறது. இதில் அடிப்படைச் சம்பளமாக ரூ.8.7 கோடி கிடைக்கும். செயல்பாட்டு ஊக்கத் தொகையாக 200% வழங்கப்படும். நிறுவன பங்குகள் மற்றும் ஊக்கத் தொகை என ரூ.574 கோடி கிடைக்கும்.

செமிகண்டக்டர் மற்றும் மென்பொருள் துறையில் 20 ஆண்டுகளுக்கு மேல் அனுபவம் கொண்டவர் டான். கடந்த 2009 முதல் 2021 வரையில் கேடன்ஸ் டிசைன் சிஸ்டம்ஸ் நிறுவனத்தின் சிஇஓ-வாக பதவி வகித்துள்ளார். இவரது பதவிக் காலத்தில் அந்நிறுவனத்தின் வருவாய் இரு மடங்கு அதிகரித்துள்ளது. இதுதவிர, துணிகர முதலீட்டு நிறுவனமான வால்டன் இன்டர்நேஷனல் தலைவராகவும் உள்ளார்.

அமெரிக்காவின் கலிபோர்னியா மாகாணம் சான்டா கிளாராவை தலைமையிடமாகக் கொண்டு இன்டல் கார்ப்பரேஷன் செயல்பட்டு வருகிறது. கணினிகளுக்கான சிபியு மற்றும் அது தொடர்புடைய சாதனங்களை தயாரித்து விற்பனை செய்கிறது என்பது குறிப்பிடத்தக்கது.