“தொழில் நிறுவனங்கள் உற்பத்தி துறையில் பெரிய முயற்சிகளை மேற்கொள்ள வேண்டும்” - பிரதமர் மோடி

புதுடெல்லி: தொழில் நிறுவனங்கள் உற்பத்தியில் பெரிய முயற்சிகளை மேற்கொள்ள வேண்டும், சர்வதேச அளவில் கிடைக்கும் வாய்ப்புகளைப் பயன்படுத்திக் கொள்ள வேண்டும் என்று பிரதமர் நரேந்திர மோடி தெரிவித்துள்ளார்.

பட்ஜெட்டுக்குப் பிந்தைய ஒழுங்குமுறை, முதலீடு, வணிகம் செய்வதை எளிதாக்கும் சீர்திருத்தங்கள் குறித்த இணையவழி கருத்தரங்கில் பேசிய பிரதமர் நரேந்திர மோடி, "இன்று இந்தியா நிலையான கொள்கைகளையும் சிறந்த வணிகச் சூழலையும் வழங்குகிறது. நாட்டின் உற்பத்தி மற்றும் ஏற்றுமதியை முன்னேற்றுவதற்கு பெரிய நடவடிக்கைகளை எடுக்குமாறு நான் உங்களை (தொழில் நிறுவனங்களை) வலியுறுத்துகிறேன்.

இன்று உலகிற்கு ஒரு நம்பகமான கூட்டாளி தேவை. தொழில்துறை வெறும் பார்வையாளராக இருக்கக்கூடாது. உலகளாவிய விநியோகச் சங்கிலியில் வாய்ப்புகளைத் தேட வேண்டும். இன்று இந்தியா உலகப் பொருளாதாரத்திற்கான வளர்ச்சி இயந்திரமாக மாறியுள்ளது. கடினமான காலங்களிலும் நாடு அதன் மீள்தன்மையை நிரூபித்துள்ளது.

குறைந்த விலையில், சரியான நேரத்தில் கடன் கிடைப்பதை உறுதி செய்வதற்காக, MSME-களுக்கு புதிய கடன் வழங்கல் முறைகளை மேம்படுத்த வேண்டியது மிகவும் அவசியம். உற்பத்தியுடன் இணைந்த ஊக்கத்தொகைத் திட்டத்தின் மூலம் தற்போது 14 தொழில் பிரிவுகள் பயனடைந்து வருகின்றன. இந்தத் திட்டத்தின் கீழ் 750க்கும் அதிகமான அலகுகள் அங்கீகரிக்கப்பட்டுள்ளன. இதன் விளைவாக ரூ. 1.5 லட்சம் கோடிக்கு மேல் முதலீடு, ரூ. 13 லட்சம் கோடிக்கு மேல் உற்பத்தி, ரூ. 5 லட்சம் கோடிக்கு மேல் ஏற்றுமதி செய்யப்பட்டுள்ளது. வாய்ப்புகள் கிடைக்கும்போது தொழில்முனைவோர் புதிய பகுதிகளில் எவ்வாறு முன்னேற முடியும் என்பதை இது நிரூபிக்கிறது.

வணிகம் செய்வதை எளிதாக்குவதை மேம்படுத்துவதில் அரசாங்கம் உறுதியுடன் உள்ளது. மத்திய, மாநில நிலைகளில் 40,000-க்கும் மேற்பட்ட இணக்கங்கள் அகற்றப்பட்டு, வணிகம் செய்வதை எளிதாக்குவதை ஊக்குவிக்கின்றன. முதலீட்டாளர்கள் முற்போக்கான கொள்கைகளை செயல்படுத்தும் மாநிலங்களை விரும்புகிறார்கள். முதலீடுகளை ஈர்ப்பதில் மாநிலங்கள் முக்கிய பங்கு வகிக்கின்றன.

மத்திய பட்ஜெட் ஒரு பெரிய மாற்றத்தை ஏற்படுத்தியுள்ளது. அது மக்களின் எதிர்பார்ப்புகளை மீறி, பொருளாதார வளர்ச்சிக்கு வலுவான அடித்தளத்தை அமைத்துள்ளது. வெளிநாடுகளில் அதிக தேவையுடன் புதுமையான தயாரிப்புகளை உற்பத்தி செய்வதற்கும், இறுதியில் ஏற்றுமதிகளை அதிகரிப்பதற்கும், உலக சந்தையில் இந்தியாவின் நிலையை வலுப்படுத்துவதற்கும் ஆராய்ச்சி மற்றும் மேம்பாட்டில் தொழில்துறை கவனம் செலுத்த வேண்டும்" என வலியுறுத்தினார்.