ஒரே நாளில் ரூ.238 கோடி வசூல்: தமிழக பதிவுத் துறையில் சாதனை!

சென்னை: தமிழக பதிவுத் துறையில் இதுவரை இல்லாத அளவு டிச.5-ம் தேதி ஒரே நாளில் பத்திரப் பதிவு மூலம் ரூ.238.15 கோடி வருவாய் ஈட்டப்பட்டுள்ளதாக துறை அமைச்சர் பி.மூர்த்தி கூறியுள்ளார்.

இதுகுறித்து அவர் வெளியிட்ட செய்திக் குறிப்பு: "தமிழக அரசின் வருவாய் ஈட்டும் துறைகளில் முக்கிய துறையாக விளங்கி வரும் பதிவுத் துறையின் வரலாற்றில் இதுவரையில் இல்லாத வகையில் 2024-ம் ஆண்டு நவம்பர் மாதத்தில் ரூ.1,984.02 கோடி வருவாய் ஈட்டப்பட்டுள்ளது. இதனை கடந்த ஆண்டு நவம்பர் மாத வருவாயுடன் ஒப்பிடும்போது, இந்த நவம்பர் 2024-ம் மாதத்தில் கூடுதலாக ரூ.301.87 கோடி வருவாய் ஈட்டி சாதனை படைக்கப்பட்டுள்ளது.

மேலும், டிச.5-ம் தேதி கார்த்திகை மாத சுப முகூர்த்த நாளில் ஆவணங்கள் அதிக அளவில் பதிவுக்கு தாக்கல் செய்யப்படும் என்பதால் சிறப்பு நிகழ்வாக பொதுமக்கள் பயன்பெறும் வகையில் முன்பதிவு டோக்கன்கள் 100-லிருந்து 150ஆக உயர்த்தப்பட்டது. அதன்படி, பொதுமக்கள் உயர்த்தப்பட்ட முன் ஆவணப் பதிவு டோக்கன்களை பயன்படுத்தி கடந்த டிச.5-ம் தேதி அன்று ஒரே நாளில் இதுவரையில் இல்லாத அளவில் அரசுக்கு ரூ.238.15 கோடி வருவாய் ஈட்டப்பட்டுள்ளது. இதன் மூலம் ஒரு நாள் வருவாய் வசூலில் புதிய மைல்கல்லை பதிவுத் துறை எட்டியுள்ளது" என்று அமைச்சர் மூர்த்தி குறிப்பிட்டுள்ளார்.