பங்குச்சந்தையுடன் இணைந்த கடன் பத்திர முதலீட்டு திட்டம்: இன்க்ரெட் மணி அறிமுகம்

சென்னை: இன்க்ரெட் மணி நிறுவனம் ‘இன்க்ரெட் 1.5x நிப்டி அக்சலரேட்டர் எம்எல்டி’ என்ற பெயரில் புதிய முதலீட்டு திட்டத்தை அறிமுகம் செய்துள்ளது.

இது இந்நிறுவனத்தின் 2-வது பங்குச் சந்தையுடன் தொடர்புடைய கடன் பத்திர (எம்எல்டி) முதலீட்டு திட்டம் ஆகும். நேற்று தொடங்கிய இந்த திட்டத்தில் வரும் 29-ம் தேதி வரை முதலீடு செய்யலாம். இது நிப்டி 50 குறியீடு வழங்கும் வருமானத்தைப் போல ஒன்றரை மடங்குக்கு (150%) சமமான வருமானத்தை வழங்கும். வரும் 2026-ம் ஆண்டு முதிர்வடையும். இந்த முதலீட்டுத் திட்டம், 100% அசல் தொகைக்கு உத்தரவாதம் அளிக்கிறது.

இதுகுறித்து இன்க்ரெட் நிறுவன தலைமைச் செயல் அதிகாரி விஜய் குப்பா கூறும்போது, “இந்திய பங்குச் சந்தைகள் உச்சபட்ச உயர்வை ஒட்டி அமைந்துள்ளன. முதலீட்டாளர்கள் முதலீட்டை தொடர்வதில் இன்னமும் ஆர்வமாக உள்ளனர். ஆபத்து-வருவாய் கண்ணோட்டத்தில் ஒருவர் தங்கள் முதலீட்டு தொகுப்பை மதிப்பீடு செய்ய வேண்டிய நேரம் இது. இந்த தருணத்தில் நம்பிக்கையுடன் முதலீடு செய்ய இந்த திட்டம் உகந்ததாக இருக்கும்” என்றார்.