ஆவணி மாத நட்சத்திர பலன்கள்  ஆகஸ்ட் 17ம் தேதி முதல் செப்டம்பர் 18ம் தேதி வரை (திருவாதிரை முதல் மகம் வரை)

ஜோதிடர் ஜெயம் சரவணன்

திருவாதிரை நட்சத்திரம்

பெரிய பெரிய கற்பனைகளும் திட்டங்களும் போட்டு வைத்து செயல்படும் மாதம் இது. அதை நிகழ்த்த பெரிய முயற்சிகளில் இறங்கியிருக்கும் நீங்கள், இந்த ஆவணி மாதம் தொடக்கத்தில் சாதகமாக நடப்பது போல் தோன்றினாலும்., கடைசி நேரத்தில் காரணமே தெரியாமல் தள்ளிப்போகும் அல்லது கைவிடப்படும்.

எனவே, நீங்கள் என்ன வேலை அல்லது தொழில் செய்து கொண்டிருக்கிறீர்களோ அதை மட்டும் முழு ஈடுபாட்டுடன் செய்து வாருங்கள். தேவையில்லாமல் அகலக்கால் வைக்காதீர்கள். இன்னும் சொல்லப்போனால் தேவையில்லாத விஷயங்களில் மூக்கை நுழைக்காதீர்கள். தேவையின்றி நுழைந்தால், அதுவே பிரச்சினையாக மாறக்கூடும்.

பெண்களுக்கு - கோபத்தை குறைத்துக்கொள்ளுங்கள். பணிபுரியும் இடம் மற்றும் அக்கம்பக்கத்தினருடன் அனுசரனையாக இருந்தால் எந்தக் குழப்பமும் இருக்காது.

மாணவர்களுக்கு - மறதி அதிகம் இருக்கும். கவனத்தையும் மனதையும் ஒருநிலைப்படுத்துங்கள். கவனச்சிதறல் உண்டாகாமல் பார்த்துக் கொள்ளுங்கள்.

கலைஞர்களுக்கு- தேடிவரும் வாய்ப்புகளை மட்டும் ஏற்றுக் கொள்ளுங்கள். நீங்களாக எதையும் தேடிப் போகாதீர்கள். அப்படி தேடிப்போனால், தேவையில்லாத மன உளைச்சல் உண்டாகும்.

பொது பலன்கள் : தலைவலி, கண் சம்பந்தபட்ட பிரச்சினைகள் வர வாய்ப்பு உண்டு. கவனம் தேவை.
வணங்க வேண்டிய தெய்வம்- சிதம்பரம் நடராஜ பெருமானை தரிசனம் செய்யுங்கள். குழப்பங்கள் தீரும். நன்மைகள் பெருகும்.
சந்திராஷ்டம தினம்- ஆவணி - 24 (செப்டம்பர் 10)

*******************************************

புனர்பூசம் நட்சத்திரம்
இந்த ஆவணி மாதம் மன நிம்மதியும், இதுவரை இருந்த குழப்ப நிலைகளும் மாறி தெளிவான சிந்தனைகள் தோன்றும் மாதம். வேலை பார்த்த இடத்தில் உங்கள் மீது காழ்ப்புணர்ச்சி காட்டியவர்களும் இப்போது மீண்டும் நட்பாக மாறுவார்கள். வீண் பழி அகலும். நீங்கள் அறியாமல் செய்த பிழைகள் மன்னிக்கப்படும்.

சொந்தத் தொழில் செய்பவர்கள் இப்போது படிப்படியாக முன்னேற்றம் காண்பார்கள். அரசு ஒப்பந்ததாரர்களாக இருப்பவர்கள் புதிய ஒப்பந்தங்கள் பெற்று மகிழ்வார்கள். குழந்தை இல்லாமல் ஏங்கியவர்களுக்கு இந்த மாதம் நல்ல செய்தி உண்டு. பிரசவ நேரமாக இருந்தால் ஆண் வாரிசுக்கு வாய்ப்பு உண்டு,வெளிநாட்டில் வசிப்பவர்களாக இருந்தால் பூர்வீகம் வரும் வாய்ப்பு உண்டு.

பெண்களுக்கு- குடும்பத்தில் அமைதி நிலவும். உறவினர் வருகையால் மகிழ்ச்சி உண்டு. வேலைக்குச் செல்பவராக இருந்தால் பதவி உயர்வு நிச்சயம். வேறு வேலைக்கு மாறும் எண்ணம் இருந்தால் இந்த மாதமே முயற்சி செய்யுங்கள். நல்ல நிறுவனத்தில் வேலை கிடைக்கும்.

மாணவர்களுக்கு - ஞாபக சக்தி அதிகரிக்கும். படிப்பில் இருந்த அலட்சியம் மாறி கவனம் அதிகரிக்கும். தேர்வில் மதிப்பெண் கூடி ஆச்சரியப்படுத்தும்.

கலைஞர்களுக்கு - எடுக்கின்ற அனைத்து முயற்சிகளும் வெற்றி பெறும். ஊடகத்துறையினராக இருந்தால் பதவி உயர்வு கிடைக்கும். புதிய முயற்சியில் ஈடுபட்டு சாதனை செய்வீர்கள். திரைத் துறையினராக இருந்தால் புதிய பட ஒப்பந்தம், நிறுத்தி வைத்த வேலைகளை மீண்டும் செய்ய வாய்ப்புகளும் உண்டாகும்.

பொது பலன்கள் : மூச்சிரைப்பு (வீசிங்) உள்ளவர்கள் கவனமாக இருங்கள். புதிய இடங்களுக்கு செல்லும் போது உணவு மற்றும் தண்ணீர் விஷயத்தில் கவனமாக இருங்கள்.

வணங்க வேண்டிய தெய்வம்- மாரியம்மன் ஆலயங்களுக்கு சென்று அம்மனை தரிசித்து வாருங்கள். கூடுதல் உற்சாகம் உண்டாகும். உத்வேகத்துடன் செயலாற்றுவீர்கள்.

சந்திராஷ்டம தினம்- ஆவணி 25 ( செப்டம்பர் 11)

********************************

பூசம் நட்சத்திரம்

கவலைகள் காணாமல் போகும் மாதம் இது. எல்லாம் சரியாகத்தான் இருக்கிறது. ஆனாலும் ஏதோ தடை அல்லது தாமதம் இருந்து கொண்டே இருக்கிறது என்ற மன அழுத்தம் கடந்த சில மாதங்களாக உங்களை வாட்டிக்கொண்டிருந்து அல்லவா... இனி அந்தக் கவலைகள் எல்லாம் பறந்து போகும்.

உங்களுக்கு இப்போது அனைத்து கிரகங்களும் நன்மைகளை வாரி வழங்கப்போகிறது. மிகச் சரியாக பயன்படுத்திக்கொண்டால், வாழ்வில் நிலையான இடத்துக்கு வந்துவிடலாம். வேலை இல்லாதவர்களுக்கு வேலை கிடைக்கும். இப்போது இருக்கும் வேலையைவிட இன்னும் நல்ல நிறுவனத்தில் வேலை மாற்றம் ஏற்படும்.

அயல்நாட்டில் வேலை எதிர்பார்த்தவர்களுக்கு உறுதியாக வேலை கிடைக்கும். சொந்தத் தொழில் செய்பவர்கள் மிக உயர்ந்த வளர்ச்சி அடையும் நேரம் இது. அலுவலகக் கிளைகள் துவங்கும் எண்ணம் ஈடேறும். பெட்டிக்கடை வைத்தவர்கள் சூப்பர் மார்க்கெட் ஆரம்பிப்பார்கள்.

திருமணம் நடக்கும், குழந்தை பாக்கியம் கிடைக்கும்.சொந்தவீடு கனவு நனவாகும். வங்கிக் கடன் எதிர்பார்த்தவர்களுக்கு எந்தத் தடையும் இல்லாமல் கிடைக்கும். நீண்டகால நோய் நீங்கும். மொத்தத்தில் 100 சதவீத நற்பலன்களும் கிடைக்கும் நேரமிது.

பெண்களுக்கு - ஆடை, ஆபரணம், சொந்த வீடு என வாங்கி மகிழ்வீர்கள். உத்தியோகத்தில் எதிர்பாராத பதவி உயர்வு கிடைக்கும். பொன்னான நேரம் இது.

மாணவர்களுக்கு - நல்ல மதிப்பெண் கிடைக்குமா? முதல்ல நாம பாஸ் ஆவோமா? போன்ற கலக்கத்தில் இருந்தவர்களுக்கு இன்ப அதிர்ச்சியாக நல்ல மதிப்பெண் கிடைத்து உற்சாகம் ஊற்றெடுக்கும் தருணம் இது. விரும்பிய கல்வி கிடைக்கும், வெளிநாட்டில் கல்வி பயிலும் வாய்ப்பு கிடைக்கும். நீங்கள் கற்ற கல்விக்கு தகுந்த வேலை வாய்ப்பு கிடைக்கும்.

கலைஞர்களுக்கு - என்னவெல்லாம் செய்து சாதிக்க வேண்டும் என்று நினைத்தீர்களோ, அதை எல்லாம் செய்து காட்ட வேண்டிய நேரம் இது. எல்லா வகையிலும் ஆதரவு கிடைக்கும். பொருளாதார முன்னேற்றம் ஏற்படும். சரியாக பயன்படுத்திக்கொள்ளுங்கள்.

பொது பலன் : நோய்நீங்கும் நேரம் வந்துவிட்டது. எனவே கவலை வேண்டாம். மாற்று மருத்துவத்தால் இன்னும் முன்னேற்றம் ஏற்படும்.

வணங்க வேண்டிய தெய்வம்- ஒருமுறை திருச்சானூர் சென்று அலர்மேல்மங்கை தாயாரை வணங்கி வாருங்கள். செல்வ வளம் இன்னும் அதிகமாகும்.

சந்திராஷ்டம தினம்- ஆவணி -26 ( செப்டம்பர் 12)
************************************************

ஆயில்யம் நட்சத்திரம்

மகிழ்ச்சிக்கு குறைவில்லாத மாதம் இது. குடும்பத்தில் சுப காரியங்கள் நடக்கும். ஒற்றுமை ஓங்கும். தன வரவு தங்குதடையில்லாமல் வரும். எதிர்பார்த்த காரியம் சுமூகமாக முடியும்.

குடும்பத்தில் புதிய உறுப்பினர் வருவார். அதாவது திருமணம் அல்லது குழந்தைப் பிறப்பு முதலான மங்கல வரவுகள் நிகழும். உத்தியோகம் தேடிக்கொண்டிருந்தவர்கள் இனி வேலை தேடத் தேவையில்லை, வேலை உங்களைத் தேடி வரும்.

அரசு உத்தியோகம் எதிர்பார்த்தவர்களுக்கு இப்போது அந்த வாய்ப்பு உண்டாகும். தொழிலில் எதிர்பாராத திருப்பம் உண்டாகி பெரிய வளர்ச்சிப்பாதை ஒளிவிளக்காய் பளிச்சிடும். முதலீடுகள் செய்வது அதிகரிக்கும்.

பங்குச் சந்தை வியாபாரம் அமோகமாக இருக்கும். வீடுகட்டுதல் அல்லது நின்று போன வீட்டை மீண்டும் கட்டுதல் போன்ற சுப செலவுகள் நிகழும். வியாபாரத்தில் நல்ல வளர்ச்சி எதிர்பார்க்கலாம்.

பெண்களுக்கு - மகிழ்ச்சிக்கு குறைவிருக்காது. ஒரு சிலருக்கு தலைவலி, தலையில் நீர்கோர்த்தல், ஒற்றைத்தலைவலி மற்றும் கண் சம்பந்தபட்ட பிரச்சினை இருந்திருக்கும். இப்போது அந்த சிக்கல்களில் இருந்தும் தொந்தரவுகளில் இருந்தும் விடுபடும் காலம் வந்துவிட்டது.

மாணவர்களுக்கு - நல்ல முன்னேற்றம் ஏற்படும் மாதம். தோல்வியின் விளிம்பிலிருந்து மீண்டு வருவீர்கள். இனி படிப்பில் அதிக கவனம் செலுத்துங்கள்.

கலைஞர்களுக்கு - கிடைக்கின்ற வாய்ப்புகள் அனைத்தும் உங்களுக்கு சாதகமாக அமையும். , சரியாக பயன்படுத்துங்கள் வெற்றி நிச்சயம். சினிமா டிவி தொடர்பு உடையவர்களுக்கு ஏற்றம் மிகுந்த மாதம். இயக்குனர்களாக இருப்பவர்களுக்கு இன்ப அதிர்ச்சி ஏற்படுத்தும் மாதம் இது. .
பொது பலன் : கண் நோய் பாதிப்பு வருவதற்கு வாய்ப்பு உண்டு. கவனம் வேண்டும்.

வணங்க வேண்டிய தெய்வம்- திருவள்ளூர் வீரராகவ பெருமாள் ஆலயம் சென்று வாருங்கள். இன்னும் கூடுதல் நன்மை பெறுவீர்கள். நோய்கள் நீங்கப் பெறுவீர்கள்.

சந்திராஷ்டம தினம்- ஆவணி 27 (செப்டம்பர் 13)

****************************************

மகம் நட்சத்திரம்
உங்கள் கவலைகளை அடித்துத் துரத்தும் மாதம் இது.

கடந்த மாதம் வரை நிறைய விரயங்கள், எதிர்பாராத செலவுகள், மருத்துவச் செலவுகள் என இருந்திருக்கும். இனி அந்தக் கவலைகள் எல்லாம் சூரியனைக் கண்ட பனி போல் மாயமாகும் நேரம் வந்து விட்டது.

உங்கள் ராசியான சிம்மத்தில் அதன் அதிபதியான சூரியன் வந்து விட்டார். இனி நீங்கள் எதற்கும் கவலைப் பட வேண்டியதில்லை. வேலையில் இருந்த அழுத்தங்கள் இனி இருக்காது. தேவையற்ற இடமாற்றம் ஏற்பட்டிருந்தால் மீண்டும் நீங்கள் விரும்பிய இடத்திற்கே பணியில் சேர்வீர்கள்.
தொழிலில் இருந்த தொய்வு நிலை மாறி சுறுசுறுப்பான சூழ்நிலை உண்டாகும்.
வெளிநாட்டில் இருந்து நல்ல தகவல் வரும். புதிய தொழில் ஒப்பந்தங்கள் உண்டாகும்.பங்கு வர்த்தகத்தில் இருப்பவர்களுக்கு நஷ்டத்தில் இருந்த நிலை மாறி லாபங்களாக மாறும்.

பெண்களுக்கு - எதிர்ப்புகள் அகன்று ஆதரவு பெருகும். திருமண ஏற்பாடுகள் உறுதியாகும். விருப்பத் திருமணங்கள் அனைவரின் சம்மதம் பெற்று சமாதானத்துடன் நிறைவேறும்.

மாணவர்களுக்கு- சிறப்பான மாதம். விரும்பிய துறையில் சேருவீர்கள். நல்ல ஆசிரியரின் வழிகாட்டுதல் கிடைக்கும்.

கலைஞர்களுக்கு - கலைத்துறையில் எதிர்பாரத வாய்ப்புகள் கிடைக்கும். விருதுகள் கிடைக்கவும் வாய்ப்பு உண்டு.

பொது பலன்கள் : ஒருசிலருக்கு கண்ணாடி அணிய வேண்டிய சூழல் உண்டாகும். கண் சம்பந்தபட்ட பிரச்சினைக்கு அலட்சியமாகவோ சுயமாகவோ மருந்து எடுப்பது கூடாது. மருத்துவரை அணுகி சிகிச்சை எடுப்பது நல்லது.

வணங்க வேண்டிய தெய்வம்- சிவாலய வழிபாடு சிறப்பைத்தரும்.

சந்திராஷ்டம தினம் - ஆவணி - 28 (செப்டம்பர் 14)